Kryetari i rrëmbyer i Melitopolit u këmbye me nëntë rusë
Është liruar Ivan Fedorov, kryebashkiaku i qytetit ukrainas Melitopol, për të cilin u raportua se u rrëmbye javën e kaluar.
Fedorov, 33 vjeç, u lirua të mërkurën në këmbim të nëntë rekrutëve rusë të kapur, tha një zëdhënës i zyrës presidenciale të Ukrainës.
Fedorov u tha se ishte rrëmbyer të premten e kaluar nga persona të panjohur në qytetin jugor Melitopol, me një popullsi prej gati 150,000 banorësh, i cili është pushtuar nga trupat ruse.
Vazhdojnë kërkimet për të mbijetuar në Mariupol
Ekipet e Emergjencave kanë vazhduar kërkimet për të mbijetuar nën rrënojat e teatrit të shkatërruar në Mariupol, nga një sulm ajror i forcave ruse.
Teatri po përdorej si strehë nga qindra civilë të Mariupolit, pasi shtëpitë e tyre u shkatërruan gjatë tri javë luftimesh.
Gati 24 orë pas sulmit, nuk ka pasur raportime për të vdekur.
“Ne shpresojmë dhe mendojmë se disa njerëz që qëndruan në teatër, mund të kenë shpëtuar”, tha për Associated Press Petro Andrushchenko, zyrtar i Bashkisë.
Ai tha se ndërtesa kishte një strehë relativisht moderne për bomba në bodrum, e projektuar për t’u bërë ballë sulmeve ajrore.
Zyrtarë të tjerë kishin thënë më herët se disa njerëz i kanë shpëtuar shkatërrimit.
Avokatja e Popullit në Ukrainë, Ludmyla Denisova, tha se streha nuk ishte shembur nga bombardimet dhe se disa njerëz kanë mbijetuar.
Në teatër po strehoheshin afro 1200 fëmijë dhe gra.
Ushtria ruse mohoi të mërkurën se e ka bombarduar teatrin në Mariupol.
Teatri historik i Mariupolit që u godit nga sulmet ajrore ruse
Të paktën 21 të vrarë pas sulmeve ruse afër Harkivit
Të paktën 21 persona u vranë dhe 25 të tjerë u plagosën, kur forcat ruse bombarduan të enjten në mëngjes një qytet në Ukrainën lindore, njoftuan autoritetet ukrainase.
Sulmet goditën një shkollë dhe një qendër kulturore në Merefa, qytezë në rajonin Harkivit.
Sipas autoriteteve ukrainase, dhjetë prej të plagosurve janë në gjendje të rëndë.
Turqia e gatshme të organizojë takimin Zelensky-Putin
Ministri i Jashtëm i Turqisë, Mevlut Cavusoglu, tha se presidenti ukrainas, Volodymyr Zelensky dhe ai i Rusisë, Vladimir Putin, e kanë ende mundësinë që të takohen për zgjidhjen e konfliktit.
Duke folur në një konferencë të përbashkët në Lviv, ministri i Jashtëm ukrainas, Dmytro Kuleba, tha se kishin rënë dakord për organizimin e një takimi midis Putinit dhe Zelenskyt.
Kurse ministri turk tha se “ekziston mundësia që të dy liderët të takohen nëse ekziston një bazë për një marrëveshje”.
“Ne thamë dje se do të ishim të lumtur të presim”, tha Cavusoglu.
“Duhet të përgatiten bazat për një takim në nivel liderësh sa më shpejt që të jetë e mundur”, shtoi ai.
Kuleba tha se shpreson që Turqia nuk do të merrte anë dhe që mund të shërbente si një garantues i çdo marrëveshje paqeje midis shteteve.