Çfarë është sistemi raketor që po vendos Britania në Poloni?
Sekretari britanik i Mbrojtjes, Ben Wallace, ka thënë se Britania do të vendosë sistemin raketor Sabre në Poloni, bashkë me 100 trupa ushtarake.
Ai ka thënë se ky vendim është marrë për të mbrojtur hapësirën ajrore polake nga “agresioni i mëtejmë i Rusisë”.
Polonia është anëtare e NATO-s dhe Mbretëria e Bashkuar edhe pjesë e saj po ashtu.
I përshkruar nga Mbretëria e Bashkuar si “sistemi më i ri për mbrojtje ajrore”, ai besohet se ka kapacitet për të goditur një objekt me madhësi të topit të tenisit që niset me shpejtësinë e zërit.
Sipas ushtrisë britanike, sistemi përfshin tre komponentë: një radar mbikëqyrjeje 3D, menaxhim të betejës - inteligjencë, si dhe një lëshues raketash.
Ky sistem mund të lëshojë raketa 99 kilogramëshe.
Sistemi i mundëson Polonisë që ta mbrojë veten nga aeroplanët luftarakë, raketat dhe bombat.
Autoritetet lokale thonë se 107 fëmijë janë vrarë në Ukrainë
Të paktën 107 fëmijë janë vrarë dhe më shumë se 120 janë plagosur prej kur Rusia ka pushtuar Ukrainën, ka thënë Zyra e Prokurorit të Përgjithshëm të Ukrainës.
Shumica e viktimave janë raportuar në Kiev, Harkiv, Donjeck, Çernihiv, Sumi, Herson, Mikollaiv dhe Zhitomir.
Mbi 410 institucione edukative janë dëmtuar nga bombardimet dhe 63 janë të shkatërruara plotësisht.
Të paktën 11 spitale besohet të jenë bombarduar, po ashtu.
Stoltenberg: Nuk mund ta marrim paqen dhe sigurinë si të garantuar
Sekretari i Përgjithshëm i NATO-s, Jens Stoltenberg u ka thënë gazetarëve se “lufta e presidentit (rus, Vladimir) Putin ka shkundur paqen dhe ka shokuar botën”.
Ai i ka bërë këto deklarata në një konferencë për media me kancelarin gjerman, Olaf Scholz në Berlin.
Ai ka lavdëruar forcat e Kievit dhe është zotuar se do të vazhdojë mbështetja për to, “në mënyrë që të shfrytëzojnë të drejtën për vetëmbrojtje, siç e parasheh Karta e Kombeve të Bashkuara”.
Ai ka falënderuar Gjermaninë për mbështetjen ushtarake dhe atë humanitare për Ukrainën dhe ka thënë se “NATO-ja ka përgjegjësi për të parandaluar këtë luftë nga përshkallëzimi i mëtejmë”, si dhe ka paralajmëruar vendet anëtare të bllokut të sigurisë se “ne nuk mund të marrim si të garantuar paqen dhe sigurinë”.
“Dje, ministrat e Mbrojtjes kanë nisur të shqyrtojnë se çfarë duhet të bëjmë për të rritur mbrojtjen tonë në periudhë afatgjatë. Kjo gjë do të kërkojë rritje të madhe të investimeve në mbrojtje”, ka thënë Stoltenberg.
Ndërkohë, Scholz ka thënë se Gjermania ka rritur fondet për forcat e armatosura të saj, për të siguruar se “NATO është e gatshme të përmbushë detyrat dhe mandatin që ka”.
Mbretëria e Bashkuar do të vendosë sistem raketor në Poloni
Mbretëria e Bashkuar do të vendosë sistemin raketor, Sky Sabre në Poloni, bashkë me 100 trupa ushtarake, ka thënë Sekretari britanik i Mbrojtjes, Ben Wallace.
Më herët gjatë javës, të paktën 35 persona janë vrarë, si pasojë e sulmeve ruse në një bazë për stërvitje ushtarake në Javoriv.
Kjo bazë gjendet afër kufirit të Ukrainës me Poloninë.