Biden e quan Putinin “kriminel lufte”
Presidenti i Shteteve të Bashkuara, Joe Biden, për herë të parë e ka quajtur “kriminel lufte” presidentin e Rusisë, Vladimir Putin.
Deri më tani, administrata Biden kishte shmangur përdorimin e kësaj fraze.
Duke folur për gazetarët pas një ngjarjeje në Shtëpinë e Bardhë të organizuar të mërkurën, Biden tha: “Mendoj se ai është kriminel lufte”.
Pas komenteve të presidentit Biden për Putinin, agjencia ruse e lajmeve TASS, raportoi se Kremlini i ka cilësuar këto deklarata të presidentit amerikan si të “papranueshme dhe një retorikë e pafalshme”.
Më herët gjatë të mërkurës, Sekretari amerikan i Shtetit Antony Blinken tha se SHBA-ja po “shikonte me kujdes” për të përcaktuar nëse forcat ruse po sulmojnë me qëllim caqe civile.
Lajmin e plotë mund ta lexoni KËTU
Zyrtarët ukrainas: Pesë të vrarë nga granatimet në Çernihiv
Pesë persona, përfshirë tre fëmijë, janë vrarë pasi forcat ruse kanë granatuar një banesë në qytetin Çernihiv të Ukrainës, thanë zyrtarët e emergjencave.
Ky qytet gjendet në veri të Ukrainës.
Ministria e Emergjencave e Ukrainës përmes një postimi në Telegram ka thënë se punëtorët e emergjencave kanë arritur të nxjerrin pesë trupa të pajetë nga rrënojat e një ndërtese shumëkatëshe.
OBSH: Sulmet ndaj spitaleve po bëhen pjesë e taktikave të luftës
Ndërtesat shëndetësore po bëhen shënjestër e luftës, paralajmëroi Organizata Botërore e Shëndetësisë, teksa tha se sistemi shëndetësor i Ukrainës “është në prag të shkatërrimit”.
OBSH ka verifikuar 43 sulme ndaj spitaleve dhe ndërtesave shëndetësore në Ukrainë dhe 46 të tjera në konfliktet e tjera në botë. Sipas kësaj organizate, ky është niveli më i lartë i sulmeve ndaj objekteve shëndetësore, sulme që janë të paligjshme sipas ligjit ndërkombëtar.
Mike Ryan, drejtor i programit për emergjenca shëndetësore në OBSH, tha se është “e papranueshme” që sulmet ndaj sistemit shëndetësor “po bëhen pjesë e strategjisë dhe taktikave të luftës”.
“Sistemi shëndetësor në Ukrainë që është në prag të shkatërrimit, por performon jashtëzakonisht mirë, por duhet të mbështetet, të forcohet, tÇi jepen mjetet bazë për të shpëtuar jetë”, tha ai.
Përveç në spitalet ukrainase, OBSH-ja ka verifikuar sulme edhe në Afganistan, Burkina Faso, Republikën Demokratike të Kongos, Libi, Nigeri, Palestinë, Sudan dhe Siri.
Biden: Ukrainës do t’i dërgojmë dronë dhe sisteme kundërajrore
Presidenti i Shteteve të Bashkuara, Joe Biden, njoftoi më 16 mars se do t’i japë 1 miliard dollarë Ukrainës përmes paketës së re të armëve me rreze të gjatë veprime dhe dronëve, duke thënë se kjo është një mbështetje e “paprecedent” për Ukrainën në luftën e saj kundër Rusisë.
Në pakon e ndihmës përfshihen 200 milionë dollarë që u ndan gjatë fundjavës dhe 800 milionë dollarë fonde të reja nga një paketë e ndihmës që është miratuar nga Kongresi javën e kaluar.
“Këto janë transferime të drejtpërdrejta të pajisjeve nga Departamenti ynë i Mbrojtjes tek ushtria ukrainase për t’i ndihmuar ata derisa luftojnë kundër këtij pushtimi”, tha Biden.
Presidenti amerikan po ashtu tha se SHBA-ja do ta ndihmojë Ukrainën që pajisjet me “sisteme shtesë kundërajrore me rreze të gjatë veprimi”.
Biden tha se Ukraina do të marrë 800 sisteme kundërajrore Stinger, 9,000 armë kundërtanke, 7,000 armë të lehta dhe 20 milionë fishekë.
Lajmin e plotë mund ta lexoni KËTU