Zelensky mbajti fjalim para Kongresit amerikan
Presidenti i Ukrainës, Volodymyr Zelensky, mbajti një fjalim para Kongresit të Shteteve të Bashkuara.
Në fillim të fjalimit, Zelensky tha se vendi i tij “është në luftën më të keqe që nga Lufta e Dytë Botërore” dhe se ai i “ka rezistuar agresionit rus për tetë vjet”.
Duke folur përmes video-lidhjes nga Kievi, Zelensky tha se qyteti është nën sulme të përditshme raketore dhe ajrore, porse “nuk dorëzohet”.
Ai përmendi ‘Pearl Harbor’ dhe sulmet terroriste të 11 shtatorit 2001 në SHBA, teksa i bëri thirrje Kongresit amerikan që të bëjë më shumë për të ndihmuar luftën e Ukrainës kundër Rusisë.
"Ne kemi nevojë për ju tani," tha Zelensky, duke shtuar, "Unë ju bëj thirrje të bëni më shumë."
Kryetarja e Dhomës së Përfaqësuesve në SHBA, Nancy Pelosi, e prezantoi atë, duke thënë se Kongresi amerikan ka “respekt, admirim dhe vlerësim të madh” për udhëheqjen e tij “të guximshme”.
“Lavdi Ukrainës”, tha ajo.
Trupat ruse vranë 10 persona derisa po prisnin në radhë për bukë
Ambasada amerikane në Ukrainë përmes një postimi Twitter ka njoftuar të mërkurën se forcat ruse qëlluan dhe vranë 10 persona në qytetin verior të Çernihiv.
Sipas ambasadës, ata po prisnin në radhë për bukë.
Vdesin shtatë refugjatë pasi automjeti që po i transportonte përplaset me autobusin
Shoferi 61-vjeçar i një minibusi dhe gjashtë refugjatë u vranë kur u përplasën me një autobus të mërkurën në mëngjes në Ukrainën perëndimore, tha policia në qytetin e Khmelnytsky.
Sipas policisë, nëntë pasagjerë të tjerë të minibusit u lënduan, derisa shoferi dhe pasagjerët e automjetit tjetër nuk u lënduan.
Refugjatët po udhëtonin nga qyteti qendror i Ukrainës, Dnipro, për në Ternopil.
Qindra mijëra njerëz janë në lëvizje brenda Ukrainës pas pushtimit rus të vendit muajin e kaluar.