Mirëmëngjesi të gjithëve dhe faleminderit që ndiqni blogun e Radios Evropa e Lirë për luftën në Ukrainë!
Të nderuar lexues, këtu po e përmbyllim raportimin e drejtpërdrejtë për luftën në Ukrainë!
Më poshtë gjeni përmbledhjen e zhvillimeve kyçe në ditën e 20-të të luftës.
Rikthehemi të mërkurën, 16 mars, nga ora 07:00.
- Bisedimet mes zyrtarëve ukrainas dhe atyre rusë kanë përfunduar pa ndonjë marrëveshje dhe do të vazhdojnë të mërkurën
- Negociatori ukrainas, Mykhailo Podolyak, ka thënë se ka kontradikta gjatë bisedimeve, por ka edhe hapësirë për kompromis
- Trupat ruse janë duke mbajtur 400 njerëz si pengje, duke përfshirë mjekët dhe pacientët brenda një spitali në Mariupol, ka thënë zëvendëskryetari i qytetit
- Sipas autoriteteve ukrainase, rreth 29,000 njerëz kanë arritur të largohen nga qytetet ukrainase të martën, përmes korridoreve humanitare
- Kryetari i Kievit, Vitali Klitschko ka shpallur orë policore për 35 orë, duke paralajmëruar për “moment të vështirë dhe të rrezikshëm”
- Sulmet ajrore ruse kanë goditur një stacion metroje dhe ndërtesa të banimit gjatë natës, duke lënë të vdekur katër persona
- Gazetarja ruse, Marina Ovsyannikova është gjobitur me rreth 213 dollarë, pasi ka protestuar gjatë transmetimit të drejtpërdrejtë të lajmeve në televizionin shtetëror të Rusisë me mbishkrimin, “Jo luftës”
- Kremlini është përgjigjur ndaj sanksioneve të reja amerikane, duke ua ndaluar 13 amerikanëve hyrjen në Rusi – përfshirë presidentit amerikan, Joe Biden
- Kryeministrat e Çekisë, Polonisë dhe Sllovenisë kanë takuar presidentin ukrainas, Volodymyr Zelensky në Kiev
Zelensky takon tre kryeministra evropianë në Kiev
Kryeministrat e Republikës Çeke, Polonisë dhe Sllovenisë, kanë arritur të martën, 15 mars, në Kiev, për të treguar mbështetje për Ukrainën, teksa vazhdojnë sulmet ruse në këtë shtet. Mirëpritja e kryeministrave të huaj në Kiev mund të konsiderohet sukses simbolik për presidentin ukrainas, Volodymyr Zelenskyn, i cili ka qëndruar në qytet me popullin e tij.
Zyrtari ukrainas: Rreth 29 mijë të evakuuar nga qytetet të martën
Rreth 29 mijë njerëz kanë arritur të largohen nga qytetet e rrethuara ukrainase, përmes korridoreve humanitare të martën, ka thënë një këshilltar i Presidencës ukrainase.
Disa civilë kanë arritur të largohen me makina private edhe nga qyteti i Mariupolit.
Autoritetet lokale të qytetit kanë thënë se forcat ruse janë duke parandaluar autobusët nga evakuimi i civilëve nga qyteti, i cili po bombardohet nga rusët.
Në qytetin verilindor Sumi, Kryqi i Kuq ka thënë se ka qenë në gjendje të evakuojë mijëra civilë në 100 autobusë.