Stafi dhe pacientët e spitalit në Mariupol "janë zënë si pengje”
Zëvendëskryetari i Mariupolit, Sergei Orlov, ka thënë për transmetuesin britanik BBC, se trupat ruse kanë marrë si pengje stafin dhe pacientët e spitalit në Mariupol.
“Ne kemi pranuar informacion se ushtria ruse ka marrë spitalin tonë më të madh.. dhe ka zënë pacientët dhe mjekët si pengje”, ka thënë ai.
“Ne mund të konfirmojmë këtë informacion, por edhe guvernatori i Donjeckut ka konfirmuar këtë informacion. Ne kemi informacion se 400 persona janë aty”.
Pamjet nga droni shfaqin shkatërrimin në rajonin Sumi
Qyteti i vogël ukrainas, Ohtirka, në rajonin Sumi, besohet se shkatërruar në masë të madhe nga bombardimet e artilerisë ruse. Pamjet nga droni, të publikuara nga ushtria ukrainase në platformën Telegram, tregojnë pasojat e sulmeve në zona banimi më 14 mars, nga të cilat kanë mbetur të vdekur të paktën tre persona. Autoritetet rajonale të Sulmit kanë raportuar se termocentrali dhe një stacion i energjisë janë shkatërruar po ashtu, dhe qyteti nuk ka rrymë dhe ujë.
Biden do të takohet me liderë të NATO-s dhe BE-së javën e ardhshme
Presidenti amerikan, Joe Biden pritet t’iu bashkohet liderëve të Bashkimit Evropian dhe NATO-s, në Bruksel javën e ardhshme, ka thënë Shtëpia e Bardhë.
Takimi i liderëve të bllokut evropian dhe NATO-s do të ketë në fokus pushtimin rus në Ukrainë, dhe aspektin e sigurisë dhe mbrojtjes.
Presidenti amerikan pritet të takohet me zyrtarët evropianë më 24 mars, ndonëse detajet tjera nuk dihen ende.
Zelensky: Ukraina duhet ta pranojë se nuk do t’i bashkohet NATO-s
Presidenti ukrainas, Volodymyr Zelensky, ka sugjeruar se shteti i tij duhet ta pranojë se nuk do të mund të anëtarësohet në aleancën ushtarake të NATO-s.
Duke folur në një video-konferencë me zyrtarët ushtarakë të martën, ai ka thënë se “Ukraina nuk është anëtare e NATO-s. Ne e kuptojmë këtë. Ne jemi njerëz të arsyeshëm”.
“Ne e kemi dëgjuar për vite që dyert janë të hapura, mirëpo kemi dëgjuar se nuk mund të anëtarësohemi. Është e vërtetë që duhet të pranohet”.
"Jam i lumtur që njerëzit tanë janë duke nisur që të kuptojnë këtë dhe të varen në veten e tyre dhe partnerët që na ndihmojnë”, ka thënë ai sipas transmetuesit britanik, BBC.
Para pushtimit, presidenti rus, Vladimir Putin ka kërkuar që Ukraina të mos anëtarësohet në NATO, duke e konsideruar këtë si një nga “garancitë për siguri” që i duhen Moskës.