Gjobitet gazetarja ruse që protestoi në televizionin shtetëror
Gazetarja ruse, Marina Ovsyannikova, e cila ka protestuar gjatë transmetimit të drejtpërdrejtë të lajmeve në një televizion rus, kundër luftës në Ukrainë, është gjobitur me 213 dollarë për “organizim të një ngjarjeje masive të paligjshme”.
Gjykata e ka shpallur atë fajtore, ka thënë agjencia e lajmeve, RIA.
Faqja e pavarur, Meduza, ka thënë se ajo është gjobitur për video-adresimin që e ka incizuar vetë, dhe jo për protestën në studion televizive.
Zelensky: Gati 100 fëmijë kanë vdekur prej pushtimit rus
Gati 100 fëmijë kanë vdekur në luftë prej nisjes së pushtimit rus në Ukrainë, ka thënë presidenti ukrainas, Volodymyr Zelensky para deputetëve kanadezë.
Ai u është drejtuar deputetëve përmes video-lidhjes.
Qyteti jugor i Ukrainës, Mariupol ka mbetur pa linja të komunikimit dhe me pak rezerva të ushqimit, ka thënë Zelensky.
Sipas tij, është raportuar që 97 fëmijë kanë vdekur në total, prej shpërthimit të luftës.
Fëmijët refugjatë ukrainas rrëfejnë tmerret e luftës
Qindra mijëra fëmijë ukrainas janë bërë refugjatë, prej kur Rusia e pushtoi vendin e tyre, Ukrainën, më 24 shkurt. Dëshmitë e tyre për tmerret e luftës përbëjnë një kombinim goditës të emocioneve të thella dhe të përshkrimeve të qeta. Fëmijët po ashtu kanë reflektuar për politikën, ndërsa një vajzë ka hamendësuar se presidenti rus, Vladimir Putin, mbase është “lënë pas dore si fëmijë”. Radio Evropa e Lirë ka intervistuar disa fëmijë refugjatë ukrainas, në Poloni dhe në Lituani, ndërmjet 2 dhe 8 marsit.
Kiev: Vdes një kameraman i kanalit Fox
Kameramani i kanalit Fox News, Pierre Zakrzewski është vrarë jashtë Kievit, ka thënë rrjeti televiziv amerikan.
Zakrzewski është vrarë dhe kolegu i tij, Benjamin Hall është plagosur, pasi makina e tyre është sulmuar të hënën në hyrje të Horenkas, rreth 20 kilometra në veri-perëndim të kryeqytetit, ka thënë shefja e Fox-it, Suzanne Scott.
“Pierre ka qenë fotograf i zonës së luftës, i cili ka mbuluar gati secilin material ndërkombëtar për Fox News, nga Iraku në Afganistanin e Siri, gjatë kohës së tij me ne”, ka thënë ajo.
Hall, korrespodent britanik 39-vjeçar, është duke u trajtuar ende në spital pas incidentit.
Ky lajm vjen pas vdekjes së regjisorit dhe gazetarit amerikan, Brent Renaud të dielën.