Stoltenberg: Rusia mund të kryejë sulm kimik dhe t’i hedhë fajin dikujt tjetër
Shefi i NATO-s, Jens Stoltenberg, ka thënë të martën se Rusia është duke bërë “pretendime absurde për laboratorët biologjikë dhe armët kimike” në Ukrainë.
“Kjo është një tjetër gënjeshtër”, ka thënë ai, duke kujtuar se Rusia pati deklaruar fillimisht se nuk planifikon të pushtojë Ukrainën.
“Ne jemi të shqetësuar se Moska mund të nisë operacion që mund të përfshijë armë kimike, dhe më pas t’ia hedhë fajin dikujt tjetër”, ka thënë Stoltenberg.
Sipas tij, përdorimi i këtyre armëve është absolutisht i “papranueshëm”.
Shtëpia e Bardhë ka thënë më parë se është e shqetësuar për këtë çështje dhe ka thënë se shtetet duhet të vëzhgojnë Rusinë rreth mundësisë së kryerjes së ndonjë sulmi të tillë.
Rusia sanksionon Bidenin
Rusia ka vendosur sanksione ndaj presidentit amerikan, Joe Biden, ka thënë Ministria e Jashtme ruse.
Sanksionet do të aplikohen për Sekretarin amerikan të Shtetit, Antony Blinken, Sekretarin amerikan të Mbrojtjes, Lloyd Austin, Këshilltarin amerikan për Siguri Kombëtare, Jake Sullivan dhe shefin e CIA-s, William Burns.
Ministria ka thënë se edhe të tjerë do të preken nga sanksionet.
Del para gjykatës gazetarja që protestoi në televizionin rus
Punëtorja e televizionit shtetëror rus, Marina Ovsyannikova, e cila ka protestuar drejtpërdrejt gjatë edicionit të lajmeve më 14 mars, ka dalë para një gjykate në Moskë.
Ajo është akuzuar për “organizim të paautorizuar të një ngjarjeje publike”.
Kjo akuzë është e ndëshkueshme me 200 dollarë, shërbim për komunitetin dhe deri në 10 ditë burgim.
Ky lajm sugjeron se gazetarja nuk është duke u akuzuar sipas ligjit të ri të Moskës “për përhapje të informacionit të rremë për forcat e armatosura të Rusisë”.
Avokatët e Ovsyannikovas nuk kanë mundur të gjejnë lokacionin e saj më herët gjatë ditës, mirëpo në një fotografi që ka qarkulluar në rrjetet sociale është parë ajo në gjykatë, bashkë me avokatin.
Stoltenberg: NATO-s mund t’i duhet rritja e forcave në lindje
Shefi i NATO-s, Jens Stoltenberg ka thënë të martën se pushtimi rus në Ukrainë ka krijuar “një realitet të ri të sigurisë” në Evropë.
Ai ka thënë se pozicioni ushtarak i NATO-s duhet të jetë i gatshëm për këtë realitet të ri.
Liderët e NATO-s do të diskutojnë të mërkurën për masat konkrete për të riforcuar sigurinë në periudhë afatgjatë, ka thënë Stoltenberg.
Sa u përket forcave tokësore, këto masa mund të përfshijnë “më shumë forca” në anën lindore të aleancës.
Ne do të konsiderojmë mundësinë “e rritjes së madhe” të forcave tona ujore dhe forcimin e mbrojtjes ajrore.
Stoltenberg ka thënë se të gjitha këto veprime do të kenë kosto, mirëpo ka mirëpritur vendimin e Gjermanisë dhe vendeve tjera të NATO-s për rritje të fondeve.
