Rreth 90 mijë njerëz në Britani kanë shprehur interesim për strehim të refugjatëve ukrainas
Të hënën, 14 mars, Qeveria britanike ka prezantuar skemën e re të refugjatëve, duke iu mundësuar njerëzve në Mbretëri të Bashkuar që të strehojnë refugjatët ukrainas.
Qeveria do t’iu ndihmojë britanikëve me 350 funta në muaj, për secilin person që strehojnë.
Të dhënat e 15 marsit kanë treguar se 88,712 njerëz kanë shprehur interesim për strehim në faqen qeveritare.
Rreth 4,600 viza u janë garantuar ukrainasve deri të hënën, ka thënë Zyra e Jashtme britanike.
Sipas të dhënave të publikuara në faqen zyrtare, 17,600 njerëz kanë aplikuar për viza.
OKB: Gati një fëmijë bëhet refugjat çdo sekondë
Rreth 1.4 milion fëmijë janë larguar nga Ukraina që nga fillimi i pushtimit rus më 24 shkurt, thanë Kombet e Bashkuara.
Sipas tyre, kjo do të thotë se gati një fëmijë në sekondë bëhet refugjat.
“Mesatarisht, çdo ditë gjatë 20 ditëve të fundit në Ukrainë, më shumë se 70,000 fëmijë janë bërë refugjatë”, tha për gazetarër në Gjenevë James Elder, zëdhënës i agjencisë së OKB-së për fëmijë, UNICEF.
“Kjo krizë, sa i përket shpejtësisë dhe shkallës, është e paparë që nga Lufta e Dytë Botërore”, tha ai.
Më herët, Organizata Ndërkombëtare për Migracionin bëri të ditur se numri i të zhvendosurve nga Ukraina ka kaluar tashmë 3 milionë.
A është e jashtëligjshme që të huajt të luftojnë për Ukrainën?
Teksa mijëra qytetarë të huaj po shkojnë në Ukrainë në mënyrë vullnetare, me qëllim që t’i ndihmojnë këtij shteti të mbrojë veten nga pushtimi rus, disa prej tyre mund të përballen me pasoja ligjore kur të kthehen në shtetet e tyre.
Shtetet e Ballkanit Perëndimor sanksionojnë pjesëmarrjen në konflikte apo luftëra të huaja.
Në Kosovë, shembull, që prej vitit 2015 ndalohet bashkëngjitja në konflikte të armatosura jashtë vendit. Qytetarët e Kosovës mund të dënohen deri në 15 vjet burgim nëse marrin pjesë në një konflikt të armatosur jashtë territorit të shtetit.
Artikullin e plotë mund ta lexoni këtu.
Sanksione të reja kundër rusëve
Mbretëria e Bashkuar sanksionoi të martën edhe 370 individë dhe subjekte ruse, për shkak të pushtimit të Ukrainës nga regjimi rus.
Disa nga emrat e rinj në listën e të sanksionuarve janë:
- Dmitry Medvedev, president i Rusisë (2008-2012), kryeministër (2012-2020) dhe kryetar i Këshillit të Sigurimit të Rusisë (nga viti 2020)
- Dmitry Peskov, zëdhënës i Kremlinit
- Sergei Shoigu, ministër i Mbrojtjes
- Maria Zakharova, zëdhënëse e Ministrisë së Jashtme ruse
- Margarita Simonyan, kryeredaktore e kanalit të lajmeve RT, i cili mbështetet nga shteti rus
- Pyotr Aven, bashkëthemelues i bankës më të madhe të investimeve në Rusi, Alfa-Bank
Sanksionet nënkuptojnë ngrirjen e aseteve të tyre dhe ndalesa në udhëtim.