Përshëndetje për të gjithë ju që sapo jeni kyçur në blogun e Radios Evropa e Lirë!
Disa nga zhvillimet e fundit janë:
- Forcat ruse kanë bombarduar disa lagje të Kievit, përfshirë ndërtesa të banimit. Së paku dy persona janë konfirmuar të vrarë.
- Korridoret e evakuimit janë planifikuar të qëndrojnë hapur nga ora 09:00 deri në 21:00 - sipas kohës lokale - në rajonin verilindor Sumi, ka njoftuar administrata shtetërore rajonale.
- Presidenti i Ukrainës, Volodymyr Zelensky, ka thënë se negociatat për paqe midis vendit të tij dhe Rusisë vazhdojnë sot.
- Kryeministrat e Republikës Çeke, Polonisë dhe Sllovenisë do të udhëtojnë sot në Kiev, për të shfaqur mbështetjen “e qartë” për Ukrainën. Ata pritet të takojnë presidentin dhe kryeministrin e Ukrainës.
- Një këshilltar i Qeverisë ukrainase ka thënë se pret që lufta të përfundojë në fillim të majit. “Unë mendoj se jo më vonë se në maj, në fillim të majit, do të duhet të kemi një marrëveshje paqeje”, ka thënë Oleksiy Arestovich.
Zelensky: Bisedimet janë duke shkuar “shumë mirë”
Presidenti i Ukrainës, Volodymyr Zelensky, tha se bisedimet e paqes me Rusinë - tani në rundin e tyre të katërt - do të vazhdojnë të martën në Turqi.
Në një video-adresim të postuar në Facebook, ai tha se është informuar se bisedimet janë duke shkuar “shumë mirë”.
“...por, le të shohim”, shtoi ai.
Zelensky po ashtu tha se forcat pushtuese ruse janë “të hutuara” dhe se “nuk kanë pritur një rezistencë të tillë nga Ukraina”.
“Ato ikin nga fusha e betejës. I braktisin pajisjet”, tha Zelensky.
“Ne i marrim pajisjet dhe i përdorim për të mbrojtur Ukrainën. Sot, trupat ruse janë në fakt një prej furnizuesve të ushtrisë sonë”, shtoi ai.
Zelensky falënderoi po ashtu civilët rusë, që, siç tha, protestojnë dhe përpiqen të përhapin të vërtetën rreth luftës.
Tre kryeministra evropianë udhëtojnë drejt Kievit
Kryeministrat e Republikës Çeke, Polonisë dhe Sllovenisë do të udhëtojnë sot në Kiev, për të shfaqur mbështetjen “e qartë” për Ukrainën, e cila ndodhet nën pushtimin rus.
Kryeministri çek, Petr Fiala, tha në një postim në Twitter se tre liderët do të takohen me presidentin ukrainas, Volodymyr Zelensky, dhe kryeministrin Denis Shmyhal.
“Qëllim i vizitës është të shprehim mbështetjen e qartë të Bashkimit Evropian për Ukrainën dhe lirinë dhe pavarësinë e saj”, tha Fiala.
“Në të njëjtën kohë, ne do të paraqesim një paketë të gjerë mbështetjeje për Ukrainën dhe qytetarët e saj. Komuniteti ndërkombëtar është informuar për këtë vizitë edhe nga organizatat ndërkombëtare, përfshirë Kombet e Bashkuara”, shtoi Fiala.
Avioni i lidhur me Abramovichin ateron në Moskë
Një avion që ka lidhje me oligarkun rus, Roman Abramovich, njëherësh pronar i klubit të futbollit “Chelsea”, ka ateruar në Moskë, raporton agjencia e lajmeve Reuters, duke cituar të dhëna nga një shërbim i gjurmimit të fluturimeve.
Avioni u ngrit nga Izraeli dhe u ndal për pak kohë në Turqi, gjatë rrugës së tij për në Rusi, tregojnë të dhënat e FlightRadar24.
Abramovich, i cili gjithashtu ka nënshtetësi izraelite dhe portugeze, u pa në aeroportin Ben Gurion të Tel Avivit të hënën, shkruan Reuters.
Ai është sanksionuar nga Britania e Madhe javën e kaluar, për shkak të lidhjeve të tij me presidentin rus, Vladimir Putin.
Bashkimi Evropian e ka ndjekur shembullin.
Abramovich ka mohuar të ketë lidhje të ngushta me Putinin.