FMN: Ekonomia ukrainase do të tkurret për 10 për qind
Ekonomia ukrainase pritet të tkurret për 10 për qind këtë vit, si rezultat i pushtimit rus, mirëpo situata mund të përkeqësohet shpejt nëse konflikti vazhdon, ka thënë të hënën Fondi Monetar Ndërkombëtar.
Raporti, i cili është përgatitur para ndarjes së 1.4 miliard dollarëve si financim urgjent i FMN-së për Ukrainën, paralajmëron se ekonomia e shtetit mund të tkurret për 25 deri në 35 për qind, bazuar në të dhënat e bruto-prodhimit të brendshëm nga Iraku, Libani dhe shtetet tjera në luftë.
Ivanna Vladkova Hollar, shefe e FMN-së për Ukrainën, ka thënë se autoritetet ukrainase janë duke bërë “përpjekje të jashtëzakonshme” për qarkullim të ekonomisë dhe sistemeve financiare gjatë kohës së luftës.
BE pajtohet për sanksione të reja kundër Rusisë
Vendet anëtare të Bashkimit Evropian janë pajtuar për një pako të katërt me sanksione kundër Rusisë, pas pushtimit të Ukrainës, ka thënë zyra e presidencës franceze e bllokut evropian më 14 mars.
Presidenca franceze e BE-së ka thënë se pjesë e pakos ndaj Rusisë do të jetë heqja e statusit të “shtetit të favorizuar për tregti”, vendim që mund t’ia hapë derën bllokut për të vendosur tarifa të ashpra ndaj mallrave ruse dhe për ta renditur Rusinë në nivelin e njëjtë me Korenë Veriore dhe Iranin.
Diplomatët kanë thënë se sanksionet synojnë të përfshijnë edhe ndalesën në importet e çelikut dhe hekurit të Rusisë, ndalesë në eksporte të mallrave luksozë, përfshirë makinat mbi 50,000 euro dhe ndalesë në investime nëpër kompanive të naftës si dhe sanksione në sektorin e energjisë.
Pronari i klubit të futbollit, Chelsea, Roman Abramovich dhe 14 individë tjerë do të shtohen në listën e sanksioneve të bllokut evropian, kanë thënë diplomatët.
Britania tashmë ka sanksionuar Abramovichin javën e kaluar, duke ia bllokuar asetet dhe duke i vendosur ndalesë në udhëtime.
Sipas revistës Forbes, pasuria e Abramovichit kap vlerën e 7.2 miliardë dollarëve.
Pakoja e sanksioneve do të zbatohet zyrtarisht kur vendimi të publikohet në revistën e BE-së.
Presidenca franceze ka thënë se kjo gjë do të ndodhë “shpejt”.
Si po rekruton Rusia mercenarë për luftën në Ukrainë?
Kanalet në mediat sociale dhe grupet private të mesazheve po përdoren në Rusi për të rekrutuar brigada të reja të mercenarëve për të luftuar në Ukrainë përkrah ushtrisë ruse, ka mësuar transmetuesi britanik BBC.
BBC-ja ka biseduar me një mercenar që po shërben aktualisht dhe me një ish-luftëtar që ka lidhje të ngushta me organizatat kryesore të mercenarëve në Rusi, të cilët kanë treguar detaje lidhur me fushatën e rekrutimit.
Mercenari që, aktualisht, është duke shërbyer tha se shumë veteranë dhe organizata Wagner ishin kontaktuar përmes një grupi privat në Telegram disa javë para nisjes së luftës. Ata u ftuan për një “piknik në Ukrainë”, dhe që të shijonin “Salo”, një yndyrë derri që tradicionalisht konsumohet në Ukrainë.
Lexojeni tekstin e plotë në linkun më poshtë.
Britania prezanton skemën për strehim të refugjatëve
Qeveria britanike ka prezantuar të hënën, 14 mars, skemën Shtëpi për Ukrainën, për ata që duan të regjistrohen për të qenë nikoqirë të refugjatëve ukrainas.
Vetëm një orë pas prezantimit të skemës, 1,500 persona janë regjistruar në sistem.
Sekretari për Komunitet, Michael Gove, ka thënë se Mbretëria e Bashkuar ka një histori të “mbështetjes së personave më të cenueshëm në periudhën më të errët”.
Nuk do të ketë kufizime në numrin e refugjatëve që mund të pranohen nëpër shtëpi, sipas skemës britanike.
Secili banor i Britanisë që strehon një refugjat, do të marrë 350 funta.
