Çfarë tha James Rubin në ditën e parë të dëshmisë në Hagë?

Rubin u pyet nga një prokuror nëse ishte i informuar për publikimin e emrave të përfaqësuesve politikë të UÇK-së gjatë gushtit 1998, duke përfshirë Jakup Krasniqin, Hashim Thaçin, Xhavit Halitin, Bardhyl Mahmutin dhe Sokol Bashotën.

Rubin u përgjigj se nuk kishte qenë në dijeni për këtë dokument në atë kohë.

Më pas, prokurori e pyeti nëse kishte dijeni për takimin mes Shaun Byrnes, i cili udhëhoqi Misionin Diplomatik të SHBA-së për Kosovën, dhe përfaqësuesve të UÇK-së më 1998.

"Me aq sa më kujtohet, nuk e kam njohur Hashim Thaçin para Konferencës së Rambujesë, më 1999”, tha Rubin, duke shtuar se "kanë kaluar 27 vjet nga ajo kohë".

Gjatë dëshmisë së tij, Rubin kujtoi një takim me Krasniqin në prill të vitit 1999, duke e përshkruar si një moment të vështirë për situatën e luftës në Kosovë.

Krasniqi kërkonte masa që nuk mund të zbatoheshin, si dërgimi i trupave tokësore në Kosovë, për t'u kujdesur për sigurinë e civilëve, tha Rubin.

Sipas tij, presidenti amerikan, Bill Clinton, e kishte përjashtuar atëkohë mundësinë e dërgimit të trupave tokësore.

"...sepse kjo do të thoshte se Clinton do të duhej të ndryshonte politikën e tij për të mos dërguar trupa tokësore", tha Rubin.

Seanca e dëshmisë rinisi pas pauzës së drekës me një deklaratë nga dy përfaqësuese të Qeverisë amerikane, të pranishme në sallë, të cilat theksuan se synojnë të mos ndërhyjnë dhe të mos e ndërpresin procesin, duke shtuar se mund të ndërhyjnë vetëm në raste të veçanta lidhur me burimet brenda Qeverisë së SHBA-së.

Derisa pauza e drekës vazhdon, ju kujtojmë se ish-ndihmësi i sekretarit amerikan të Shtetit, James Rubin, është i pari që hapi dëshminë e mbrojtjes për ish-eprorët e UÇK-së në Hagë.

Rubin është një diplomat dhe ekspert i njohur amerikan me mbi 35 vjet përvojë në politikën e jashtme.

Në vitin 1999, ai ishte i angazhuar si negociator i posaçëm për të siguruar çmobilizimin e Ushtrisë Çlirimtare të Kosovës.

Në rolin e dëshmitarit, ai u thir nga ekipi mbrojtës i Hashim Thaçit, ish-udhëheqës politik i UÇK-së.

Thaçi vepronte kryesisht si udhëheqës politik, pa kompetenca për vendime ushtarake brenda UÇK-së, dhe duhej të merrte miratimin e komandantëve për çdo vendim të rëndësishëm ushtarak, tha Rubin gjatë dëshmisë.

Mbrojtja e të akuzuarve i tha Radios Evropa e Lirë se lista e atyre që do të dëshmojnë në anën e tyre, nisur nga 15 shtatori, është konfidenciale.

Në media, megjithatë, qarkulluan disa emra - në mesin e tyre: Wesley Clark, William Walker, Bernard Kouchner e të tjerë.

Të njëjtit u përmendën edhe në një listë që zbuloi mbrojtja në vitin 2022.