د کابل یوشمېر اوسیدونکو د سه شنبې په ورځ (د کب په ۷مه) ازادي راډیو سره خبرو کې وویل چې د کورونو تالاشي او پلټل یې د طالبانو د " ځانګړو ځواکونو" له خوا کیږي.
دوی ادعا کوي چې د تلاشیو پر مهال "نامناسب" چلند ورسره کېږي.
د کابل ښار د ۱۵ ناحیې اوسېدونکې چې د موضوع د حساسیت له امله یې نه غوښتل په راپور کې یې نوم خپور شي، ازادي راډیو ته وویل "څلور ورځې مخکې زموږ کورونو ته له کورنیو چارو وزارت نه د ځانګړې قطعې ځواکونونه راغلي وو،هلکان یې وپلټل، تلیفونونه یې وکتل، بیا دوه ځلي کورونو ته تلاشي راغله، ښځې یې ووېستې، تلاشي یې وکړه نور ولاړل."
څلور ورځې مخکې زموږ کورونو ته له کورنیو چارو وزارت نه د ځانګړې قطعې ځواکونونه راغلي وو،هلکان یې وپلټل، تلیفونونه یې وکتل، بیا دوه ځلي کورونو ته تلاشي راغلهد کابل ښار یو اوسیدونکی
د کابل د خواجه بغرا سیمې یوه اوسېدونکي چې ده هم د موضوع د حساسیت له امله نه غوښتل راپور کې یې نوم خپور شي، د ازادي راډیو ته وویل "هو لکه خواجه بغرا، پنجصد فامیلیو، خیرخانې علاقو کې دې سیمو کې دا څو ورځې کېږي چې تلاشۍ شروع شوې دي، دوی ځکه داسې تلاشۍ کوي چې وایي دې سیمو کې داعش او شمالي ټلوالې فعالیت کوي، خو ځورونې په کې شته، خلک په کې ځورول کېږي."
د خیرخانې د پنجصد فامیلیو سیمې یو اوسېدونکي چې د موضوع د حساسیت له امله یې په راپور کې د هویت او غږ خپرولو ډډه وکړه، په راستولي پیغام کې ازادي راډیو ته لیکلي چې "د دې تلاشیو له امله خلک سخت په تکلیف کې دي."
که څه هم دوی د ځورولو د څرنګوالي په اړه څه ونه ویل خو له دې وړاندې په ورته مسایلو کې د دغو سیمو اوسېدونکو په ځانګړي ډول هغو کسانوچې کورونه یې پلټل شوي وو، ازادي راډیو ته یې ویلي وو چې د طالبانو ځواکونه له خلکو سره سم چلند نه کوي.
د طالبانو د حکومت د کورنیو چارو وزارت ویاند عبدالمتین قانع او د کابل امنیه قوماندانۍ ویاند خالد ځدران د تازه تلاشیو او ادعاو په اړه د ازادي راډیو پوښتنې ځواب نه کړې خو له دې وړاندې یې د تلاشیو هدف د ښار د امنیت تامینول بللي دي.
په کابل کې تالاشۍ داسې مهال پيل شوي چې په دې وروستیو کې د طالبانو په ضد یوشمېر حملې شوي چې مسولیت یې د دوی سیاسي او پوځي مخالفانو او دغه راز داعش ترهګرې ډلې منلی دی.