له پاکستانه د افغان کډوالو د ایستلو د اندېښنو په زیاتېدو سره، پاکستاني چارواکو یو ځل بیا خبرداری ورکړی چې د "ای سي سي" کارت درلودونکو افغان کډوالو او هغوی چې د استوګنې قانوني اسناد نه لري او تر اوسه په دغه هیواد کې پاتې دي، پر وړاندې به قانوني کړنې ترسره کړي.
پاکستاني ورځپاڼو له دې ډلې اکسپریس ټریبیون د پاکستان د صدراعظم د دفتر د یوې اعلامیې پر بنسټ راپور ورکړی، چې د اپرېل په ۲مه نېټه، د پاکستان د کورنیو چارو وزیر محسن نقوي له صدراعظم شهباز شریف سره د ورځپاڼې په ټکو د غیر قانوني بهرنیانو او د د "ای سي سي" کارت درلودونکو افغان کډوالو د بېرته ستنولو د پرمختګونو په اړه خبرې کړې دي.
د پخوانۍ ټاکلې مودې تر پایه ۸۸۶ زره افغانان خپل هېواد ته بېرته ستانه شوي ديمحسن نقوي
د دې ناستې تمرکز پر هغو اجرایوي اقداماتو وو، چې د پاکستان د کورنیو چارو وزارت یې د افغان کډوالو د ایستلو لپاره تر ټاکل شوې مودې وروسته ترسره کوي.
محسن نقوي ویلي، د پخوانۍ ټاکلې مودې تر پایه ۸۸۶ زره افغانان خپل هېواد ته بېرته ستانه شوي دي.
د راپور له مخې، شهباز شریف د قانون د اجراېي ادارو له هڅو ستاینه کړې ده.
اکسپریس ټریبیون دغه شان لیکلي چې د پاکستان فدرالي حکومت د کوچني اختر د رخصتیو له امله د افغان کډوالو د ایستلو موده ځنډولې ده.
مخکې اسوشیېټډ پرېس خبري اژانس هم راپور ورکړی و چې د پاکستان حکومت د کوچني اختر د رخصتیو له امله د افغان کډوالو د ایستلو موده د اپرېل تر۱۰مې نېټې پورې ځنډولې ده.
د پاکستان حکومت د روان کال د جنورۍ په میاشت کې اعلان کړی و چې د مارچ ۳۱مه به د هغو افغان کډوالو لپاره وروستۍ نېټه وي، چې "ای سي سي" کارتونه لري یا هېڅ قانوني اسناد نه لري.
پولیسو د اسلاماباد او راولپنډۍ په بېلابیلو سیمو کې د افغان کډوالو نیول پيل کړي او د هغوی د بېرته ستونول هڅې یې زیاتې کړې دي.
وضعیت ډیر بد دی، خلک په کور کې بندیان دي، ګرځېدای راګرځېدای نشي، خوشحالي نشته، زه خپله د اختر درې ورځو کې له کوره نه یم وتی، نیول بیخي زیات شويافغان کډوال
یو افغان کډوال، چې د موضوع د حساسیت له امله یې نه غوښتل نوم یې په راپور کې واخیستل شي، رادیو ازادۍ ته ویلي،
" وضعیت ډیر بد دی، خلک په کور کې بندیان دي، ګرځېدای راګرځېدای نشي، خوشحالي نشته، زه خپله د اختر درې ورځو کې له کوره نه یم وتی، ستونزې او نیول، نیول پیخي زیات شوي."
یو بل افغان، چې په اسلاماباد کې اوسیږي او ده هم ونه غوښتل چې نوم یې راپور کې واخیستل شي، د دې وضعیت په اړه خپله اندېښنه څرګنده کړې:
" وضعیت خراب دی، په اسلام اباد کې کورنه خالي کېږي، افغانان له اسلام اباد او راولپنډۍ وځي، دلته یې شمیر ډیر کم شوی، زمونو دوستان چې کویټې، کراچۍ، هیبټ اباد، اټک او پېښور کې دي وايي دلته اوس افغانان دومره زیات شوي چې هیڅ کور نه پیدا کېږي."
په تورخم کې د کډوالو چارو یو شمېر مسؤلینو پاکستانی خبریالانو ته ویلي چې د اپرېل په لومړۍ نېټه ۹۰ افغان کډوال بېرته افغانستان ته ستانه کړل شوي دي، چې له دې ډلې ۷۷ کسان د "ای سي سي" کارت لرونکي او ۱۳ نور بې اسنادو وو.
په ورته وخت کې، د افغان کډوالو مدافع وکیلې منزه کاکړ د اپرېل په ۲مه په خپل ایکس پاڼه (پخواني ټویټر) لیکلي چې د پاکستان په بېلابېلو برخو کې د افغان کډوالو د ایستلو کمپاین چتک شوی او پولیس ان ثبت شوي کډوال هم نیسي.
نوموړې د "پی او آر" کارت یوه انځور خپور کړی او ویلي یې دي چې انورالحق، چې دا کارت یې درلود، د اسلاماباد له باراکاو سیمې څخه نیول شوی او د حاجي کمپ ته لېږدول شوی دی.
د ملګرو ملتونو د کډوالو عالي کمیشنري (UNHCR) د معلوماتو له مخې، ۱.۳ میلیونه افغانان د کډوالو د ثبت "پی او آر" کارتونه لري.
دغه شان ۸۰۰ زره نور افغانان د "ای سي سي" یا افغان تابعیت کارت لري، چې له ټاکلې مودې وروسته به د پاکستان له خاورې وایستل شي.
