د پولتاوا سیمې والي ولادیمیر کوهوت د پنجشنبې په ورځ په ټیلیګرام کې ولیکل چې د پولتاوا په میرهورډ ښار کې د روسیې برید اور ولګاوه چې وروسته د بیړني خدماتو لخوا مړ شو.
د اوکراین د اوسپنې پټلۍ دولتي ادارې دا هم وویل چې د روسیې بریدونو په سیمه کې د سټیشنونو بریښنا په موقت ډول قطع کړه، چې د مسافر وړونکو اورګاډو د ځنډ لامل شو.
په پولتاوا کې پرریل پټلۍ له بریدونو مخکې په خارکیف او دونیتڅک کې هم روسي ځواکونو ورته اهداف په نښه کړي وو.
د اوکراین د سیمه ییزې پراختیا وزیر اولیکسي کولیبا روسیه تورنه کړه چې په قصدي ډول د اوکراین لوژستیک او ملکي زیربناوې په نښه کوي ترڅو د هیواد پر اوسیدونکو او اقتصاد فشار زیات کړي.
د روسیې بریدونه په کیف او چیرنیهیف سیمو کې هم راپور شوي.
د اوکراین هوايي ځواک وویل چې دوی د روسیې لخوا توغول شوېو پنځه اویا ډرون الوتکو څخه ټولټال اته څلویښت ویشتلي دي.
بل لورته روسیې هم په ولګوګراد سیمه کې د اوکراین د بې پیلوټه الوتکو د لوی برید راپور ورکړی دی.
د سیمې والي، اندری بوچاروف، وویل چې د ډرون ټوټې غورځیدو د دوو شخصي کورونو چتونه ویجاړ کړي دي.
عیني شاهدانو ویلي چې د ولګوګراد ښار په جنوبي برخه کې یې د یو لړ چاودنو غږونه اوریدلي دي.
وروسته، د اوکراین ځانګړو ځواکونو وویل چې دوی د ولګوګراد د تیلو پر تصفیه خانې برید کړی او تاسیسات یې اړ د عملیاتو درولو ته اړ کړي.
روسي چارواکو دا ادعا هم کړې چې د روسیې د بلګورود سیمې په شیبیکینو ښارګوټي کې د اوکراین د بې پیلوټه الوتکې په برید کې یو سړی وژل شوی او ورور یې سخت ټپي شوی دی.
پر اوکراین روسیې بې دلیله یرغل چې د ۲۰۲۲ کال د فبروري په ۲۴مه پیل شو، لا هم دوام لري.