سږ کال په جرمني کې ۳۰ زر او ۷۷۹ افغانانو د پناه غوښتنې کړي دي.
د جرمني د مهاجرت او کډوالو د فدرال ادارې د جمعې ورځې «سپټمبر پنځمې» د ارقامو په اساس د افغان پناه غوښتونکو دا شمېر د هغو یو لکو کسانو په ډله کې چې جرمني کې یې د اګست تر پایه د پناه غوښتنې ثبت کړي د یوه هېواد د اوسیدونکو تر ټولو لوړ شمېر دی.
د پناه غوښتنې اړوند یو لک قضیو کې ۲۵ زره او ۷۶۶ نورې قضیې تعقیبې وې هغه اصطلاح چې د پناه غوښتونکو حالت د حقوقي شرایطو او د نویو شواهدو د ترلاسه کېدو په خاطر بدل شوی.
په دې تعقیبي دوسیو کې هم د افغانانو تر ټولو زیاتې وې ځکه ۱۴ زر او ۸۶۵ د افغان اتباعو وې او پکې لږ تر لږه ۹ زر او ۱۳۹ دوسیې د افغان مېرمنو له خوا ثبت شوې دي.
له دې سره سره سږ ۲۰۲۵ کال د تېر کال په نسبت د پناه غوښتنې قضیې څه ناڅه کمې شوي دي.
په اګست میاشت کې د پناه غوښتنې ۷ زر او ۸۰۳ دوسیې ثبت شوې وې حال دا چې د ۲۰۲۴ کال په اګست کې ۱۸ زر او ۴۲۷ قضیې ثبت شوې وې.
سره له دې چې سږ کال د پناه غوښتنې عمومي شمېر راټېټ شوی خو بیا هم جرمن چارواکي د افغانانو د پناه غوښتنو په شمېر کې د زیاتوالي لوی لامل د اروپايي ټولنې د عدالت محکمې د ۲۰۲۴ کال د اکتوبر د څلورمې پرېکړه یادوي.
هغه وخت یادې محکمې پرېکړه کړې وه چې افغانستان کې د ښځو په وړاندې د طالبانو سیستماتیک او ټولیز تبعیضي اقدامات چې پکې پر تعلیم، کار او سفر بندیزونه، جبري ودونه او ګڼ نور محدودیتونه شاملیږي افغان ښځې د هغوی د جنسیت او ملیت په اساس په اتومات ډول د نړیوال خوندیتوب مستحقې ګرځوي.
د محکمې د یاد اقدام په اساس باید اروپايي هېوادونه انفرادي مسلو او دوسیو ته له پام پرتې هغو افغان ښځو ته پناه ورکړي چې له خپل هېواده راوتلې دي.
