د تور سمندرګي په تفریحي ښار سوچي کې روسي چارواکو وویل چې اوکرایني بې پیلوټه الوتکو نن د اګست په دریمه نیټه د تیلو سیمه ایزې ډیپو ته اور اچولی دی.
ویل کیږي له ۱۲۰ څخه ډیر اور وژونکي د اور د کنټرول لپاره هلې ځلې کوي.
بلخوا د اوکراین په جنوب کې د میکولایف سیمی والي نن یکشنبه وویل چې د روسیې د توغندیو برید کورونه او ملکي تاسیسات ویجاړ کړي. په برید کې لږ تر لږه اووه ملکي وګړي ټپیان شوي دي. د اوکراین د دولتي بیړني خدماتو ادارې وویل چې د ټپیانو څخه د درې کسانو په روغتون کې درملنه کیږي.
اوکراین هم د روسیې په داخل کې د بی پیلوټه الوتکو بریدونو ته په داسې مهال زور ورکړی دی چې دامریکا ولسمشر دونالد ټرمپ خپل روسي سیال ویلادیمیر پوتین باندې فشار زیات کړی چی د اوکراین د څلورکلنې جګړې د پای ته رسولو لپاره اوربند ومني.
ولسمشر ټرمپ د روسیې ولسشمر پوتین ته د اګست میاشتې تر اتمې وخت ټاکلی چې جګړه پای ته ورسوی کنه د روسيې د تیلو او په نورو صاداراتو به شدیدې تعرفې ولګوي.
خو ددغه ضرب الاجل د اعلان سره همهاله روسیې د تیرې پنجشبنې په ورځ په کیف باندې د سلګونو بی پیلوته الوتکو برید وکړ چې په نتیجه کې یې لږ ترلږه ۳۱ کسه ولسي خلک ووژل شول .
اوکراین هم د روسیې په تاسیساتو باندې خپلو هوايی بریدونو ته زور ورکړ.
روسي چارواکو وویل د سوچې ښار د تیلو په تصفیه خانې د اوکراین تازه برید یو دهغو بریدونو څخه دی چې کیف دیکشبنې په ورځ د روسیې په جنوب کې د ریازان، پینزا او ورونیژ په ښارونو وکړل.
د روسیې دفاع وزارت هم دیکشبنې په ورځ وویل چې ددوی دافع هوا ځواکونو تیره شپه ټولټال د ۹۳ اوکرایني بی پیلوټه الوتکو مخه ونیوله چې په دوی کې د ۶۰ الوتکو مخه د تور سمندرګي د پاسه ونیول شوه.
بلخوا اوکرایني ځواکونو وویل چې روسیې تیره شپه ۸۳ بی پیلوټه الوتکې او څو توغندوي د اوکراین لور ته وتوغول چې ۶۱ یي نسکور کړای شول.
اوکرایني ځواکونو وویل چې ۱۶ بی پیلوټه الوتکې او ۶ توغندی په اتو سیمو کې اهدافو باندې ولګیدل.