د جرمني ( ډي.پي.اې) خبري اژانس په اسراییل کې د امریکا د سفیر مایک هکابي په حواله ویلي چې توغندی د قونسګلرۍ ودانۍ ته نژدې لګیدلی دی، خو په وینا یې کوم امریکایي ته زیان نه دی رسیدلی.
د هکابي په خبره د احتیاطي تدابیرو په مخه به نن دوشنبه ( د غبرګولي ۲۶مه) په تل ابیب او بیت المقدس کې د امریکا سیاسي استازولۍ تړلې وي.
لویدیځو اژانسونو د اسراییلي چارواکو په حواله ویلي چې ایران تیره شپه او نن سهار وختي پر اسراییلو توغندي توغولي چې تل ابیب، حیفا او نورو ښارونو کې لګیدلي دي.
نننیو بریدونو کې د اسراییل دننه د پنځو تنو د وژل کېدو خبر ورکړل شوی. له دې سره په اسراییل کې د ایران د بریدونو له کبله د وژل شویو شمېر ۱۹ ته پورته شو.
څه باندې دوه سوه نور ټپیان شوي دي.
اسراییل هم پر ایران خپلو بریدونو ته دوام ورکړی او نن سهار د ایران په کرمانشا ښار کې د لږ تر لږه ۴ چاودنو غږونه اوریدل شوي دي.
د اسراییل پوځ ویلي چې تهران کې یې نن د سپاه پاسداران انقلاب مرکزونه ویشتلي.
ایراني چارواکو د نننیو بریدونو په اړه څه نه دي ویلي، خو د روغتیا وزارت تایید کړې چې په تېرو څو ورځو کې لږ تر لږه ۲۲۴ کسان وژل شوي او ۱۲۷۷ نور ټپیان دي.