جورج سیمیون به د مې په اتلسمه د انتخاباتو په دوهم پړاو کې د پلازمېنې بخارست له ښاروال نیکورسور دان سره مخامخ شي.
تمه ده چې جورج سیمیون او نیکورسور دان به د انتخاباتو په دوهم پړاو کې سیالي سره وکړي.
د انتخاباتو مرکزي دفتر نن (د مې پنځمه) سهار مهال اعلان وکړ چې د ۹۹،۶ سلنه رایو له شمېرنې وروسته سیمیون د AUR ګوند ۳۸ کلن مشر په سلو کې د ۴۰،۷ رایو په ګټلو سره د انتخاباتو مخکښ دی او سیال یې ۵۵ کلن ډن چې منځلاری سیاستوال بلل کېږي، تېره شپه ناوخته د واکمن ائتلاف پر غړې کرین انتونیسکو بریالی شو او په بهر کې د دېره رومانیایي کډوالو د رایو په مرسته یې دوهم ځای ترلاسه کړ او په دې توګه یې د رومانیا د دې مهمو انتخاباتو دوهم پړاو ته لاره وموندله.
له رایو وروسته نظرپوښتنې هم د انتخاباتو نتایجو ته ورته وې که څه هم په نظرپوښتنو کې اټکل کېده چې د سیمیون واټن به له خپل سیال ډن څخه ډېر او د ډن د ټولو رایو شمېر به تردې زیات وي.
د دې انتخاباتو نتایج له رومانیا څخه بهر هم تعقیبېږي ځکه ښاغلی سیمیون د اوکراین او ملداویا پر ځینو سیمو د رومانیا د مالکیت ادعا لري او همداراز له اوکراین سره د رومانیا پوځي مرستې یې هم د پوښتنې وړ بللې دي. نوموړي پر اوکراین د روسیې پر برید هم نیوکې کړې دي.
د رومانیا د ولسمشرۍ د انتخاباتو نتایج له بهر څخه هم له نژدې څارل کېږي.
په تېره نوامبر میاشت کې روس پلوي ملتپال کالین جورجیسکو چې د یو وروسته پاتې کاندید په سترګه ورته کتل کېدل د انتخاباتو په لومړي پړاو کې د پام وړ بریا ترلاسه کړه خو وروسته له دې چې پر هغه دا تور ولګېد چې ګنې روسیې یې له نوماندۍ سره مرسته کړې، چارواکو د نوموړي د رایو نتایج لغو کړل او په دې توګه په نویو انتخاباتو کې له ګډون څخه بې برخې شو او د مې د څلورمې د انتخاباتو لپاره یولړ نوي قوانین وضع شول.
د دې انتخاباتو د نتایجو لغو کېدلو په بهر کې یولړ غبرګونونه وپارول. په دې کې یو، د امریکا د مرستیال ولسمشر جې ډي ونس غبرګون و.
ښاغلي ونس په فبروري میاشت کې د میونیخ په امنیتي کنفرانس کې په خپله وینا کې رومانیايي چارواکي تورن کړل چې د ګاونډیو هېوادونو د مشکوک او بې بنسټه فشار پربنسټ په اقداماتو لاس پورې کوي.