ډبیلو ایف پي په دې اړه په یوه اعلامیه کې چې نن سې شنبه د مارچ ۱۱ مه یې د ملګرو ملتونو د بشري چارو د همغږۍ دفتر په ویب پاڼه خپره کړی ویلي، دا ستونزه په داسې حال کې رامنځته شوې چې د افغانستان په بېلابېلو سیمو کې د فبرورۍ په میاشت کې د رامنځته شویو سیلابونو او سختو اورښتونو له امله د ښځو او ماشومانو په ګډون ۳۰ تنه مړه او ژوبل شول.
دغه ادارې ویلي د دغه افتونو له امله د هغه کسانو د شمېر په اړه لا هم څېړنې روانې دي چې بشري مرستو ته اړتیا لري.
خلک عاجلو بشري مرستو ته اړتیا لري، فصلونه او کورونه یې له منځه تللي دي، دې خلکو سره چې کومې مرستې کیږي هغه په تورخم کې بندې پاتې ديد ننګرهار اوسیدنکی ملک یعقوب
په اعلامیه کې راغلي دي چې د پاکستان او افغانستان ترمنځ د تورخم دروازه د تېرې فبرورۍ په ۲۱ مه د وسله والې نښتې له امله وتړل شوه چې د ډبیلو ایف پي د لاریو په ګډون دواړو غاړو ته زرګونه په سوداګریزو توکو بار نورې لارې هم بندې پاتې دي.
دا په داسې حال کې ده چې د ملګرو ملتونو د سازمان د معلوماتو پر بنسټ په افغانستان کې په روان میلادي کال ۲۲ عشاریه ۹ میلیونه وګړي بشري مرستو ته اړتیا لري.
بشري مرستو ته اړمن افغانان
د وروستیو طبیعي پېښو ځپل شوې یو شمېر کورنۍ وايي له بد اقتصادي وضعیت سره مخ دی او بېړنیو مرستو ته اړتیا لري.
د میدان ورګ ولایت اوسېدونکې سید پاچا ازادي راډيو ته وویل،
"زموږ کوم باغونه چې سیلابونو ځپلي وو په خپل حال دی، خلک زیاتې ستونزې لري، ډیری خلک د اړتیا له مخې ایران ته د کار لپاره ځي، او خلک دلته د نغدي مرستې ترڅنګ د خوراکي موادو مرستو ته ډېره اړتیا لري."
د ننګرهار د بهسودو ولسوالۍ د دامان سیمې اوسیدونکی ملک یعقوب هم ورته نظر لري،
" خلک عاجلو بشري مرستو ته اړتیا لري، فصلونه او کورونه یې له منځه تللي دي، دې خلکو سره چې کومې مرستې کیږي هغه په تورخم کې بندې پاتې دي، موږ هیله لرو چې د تورخم دروازه ژر ترژه خلاصه شي او اړمنو خلکو ته مرستې راورسیږي."
په تورخم کې د طالبانو د حکومت کمېسار د تورخم د اوسني وضعیت په اړه ازادي راډيو ته معلومات ورنکړل خو د افغانستان او پاکستان د سوداګرۍ د ګډې خونې مسولین وايي د تورخم دروازه لا هم تړلې ده.
تر اوسه د دروازې د خلاصېدو په اړه کومه هوکړه نه ده شوې خو هڅې روانې دي چې د دې ستونزې د حل لپاره یوه لاره ولټول شينقیب الله صافي
د افغانستان او پاکستان د سوداګرۍ د ګډې خونې اجرایيوي ریس نقیب الله صافي د سې شنبې په ورځ په دې اړه ازادي راډيو ته وویل،
"د تورخم دروازه اوس مهال تړلې ده، د خصوصي سکتور په هڅو د دواړو لوریو یوه جرګه هم جوړه شوه او خپلې ناستې یې هم وکړې، او یوه بله ناسته هم کوي، تر اوسه د دروازې د خلاصېدو په اړه کومه هوکړه نه ده شوې خو هڅې روانې دي چې د دې ستونزې د حل لپاره یوه لاره ولټول شي."
نوموړي وویل چې په څو وروستیو ورځو کې سوداګرو او د سیمې اوسیدونکو ته په مستقیم او غیر مستقیم ډول ډیر زیانونه اوښني دي.
د لنډي کوتل یو شمېر اوسېدونکو هم ازادي راډيو ته وویل چې په تورخم کې اوس مهال وضعیت ارامه دی، جګړه نشته خو لاره بنده ده.
د تورخم درواز د تېرې فبرورۍ د میاشتې په ۲۱ مه د پاکستان له لوري د هر ډول تګ راتګ پر مخ وتړل شوه.
پاکستاني ځواکونو تور پورې کړی چې دا دروازه یې د طالب ځواکونو له لوري په یو ممنوعه ځای کې د یوې پوستې د جوړولو په غبرګون کې تړلې ده خو د طالبانو حکومت ویلي چې دوی په خپله خاوره کې د تاسیساتو د جوړولو حق لري.