دا جګړه د فبرورۍ په ۲۱ د پاکستاني ځواکونو له خوا د تورخم دروازې تر تړل کېدو وروسته پیل شوې او تېره شپه یې دریېمه شپه وه.
د تورخم یوه اوسېدونکي فرمان شاه ازادي راډیو ته ویلي:
"نن سهار تر څلورو بجو جګړه روانه وه، اوس جنګ کراره شوی، نن سهار څلور بجې ډرون هم راغلې، خو بمبار یې ونه کړ."
په دې جګړه کې دواړو لورو ته د مرګژوبلې د اوښتو راپورونه ورکړل شوي، خو کره شمېره یې لا معلومه نه ده.
پاکستاني لوري تور پورې کړی چې طالبانو غوښتل چې له کرښې اغاړه د پاکستان په خاوره کې تاسیسات جوړ کړي ، خو د تورخم د طالبانو کمیسار ویلي، "موږ په خپله خاوره کې تأسیسات جوړوو."
جګړې بشري ناورین رامنځ ته کړی
پر کرښه افغانستان کې د طالبانو د حکومت او پاکستاني لورې ترمنځ د تریتګلتیا او جګړې له امله په سیمه کې د ډیورنډ کرښې دواړو غاړو ته پراته خلک له خپلو کورونو بېځایه شوي، د تورخم د دروازې تړل کیدو مسافر، د ناروغانو په ګډون، ستونزو سره مخ کړي دي او سوداګرو ته هم درانه مالي زیانونه اوښتي دي.
ولي خان، چې اوس لعلپوره کې په یو کمپ کې بېځایه شوی، ازادي راډیو ته ویلي:
"وچه ډوډۍ ولسي خلک راوړي، بېګاه یې هم راوړې وه، توزیع یې کړه، سرپناه هم نشته. جګړه چې پیل شوه، ټول دلته راغلو. کومې خېمې چې وې، خلکو ونیولې، چا نوې ووهلې، تر اوسه هېڅ مرسته نه ده شوې."
فرمان شاه هم له سختو شرایطو شکایت کړی:
"خېمو کې اوس پراته یوو، ستونزې مو ډېرې زیاتې دي، د اوبو ستونزه هم لرو، د ډوډۍ ستونزه هم، مطلب هېڅ نه لرو."
نوموړی له مرستندویه ادارو او د طالبانو حکومت څخه د مرستې غوښتنه کوي.
د سوداګرو اندېښنې
په ننګرهار کې د سوداګرۍ او پانګونې خونې د مدیره پلاوي غړی مخلص احمد وایي، د لارې د پرانیستل کېدو لپاره دوه ځلي مذاکرات شوي، خو ناکام شوي دي:
"دواړو خواوو ته مسافر بند پاتې دي، هغوی چې د درملنې لپاره تللي وو، بېرته راغلي، خو اوس تورخم کې بند دي. زموږ د سوداګرو سلګونه لارۍ په لاره ولاړې دي، په ځانګړي ډول ترانزیټي لارۍ چې باید کراچۍ ته ورسېږي، خو که و نه رسېږي، هره ورځ ۱۲۰ ډالره جریمه پرې راځي."
د افغانستان او پاکستان سوداګر هڅه کوي چې پر خپلو حکومتونو فشار راولي، څو جګړه بنده شي.
د افغانستان او پاکستان د سوداګرۍ د ګډې خونې یو مسوول خان جان الکوزی ازادي راډیو ته ویلي:
"جګړه زموږ په لاس کې نه ده، خو بیا هم هڅې کوو چې دا جګړه، چې دواړو لوریو ته په دې روژه کې د اقتصادي فشار لامل ګرځي، ودریږي."