په افغانستان کې د بشري حقونو د روان وضعیت په اړه پرون (د کب ۱۰مه) په ژنیو کې د ملګروملتونو د بشري حقونو شورا په ۵۸مه غونډه کې بحث وشو.
په دې غونډه کې د بېلابېلو هېوادونو استازو د افغانستان د بشري حقونو لپاره د ملګروملتونو د ځانګړي راپورتر ریچارډ بینیټ د راپور په اړه په خپلو ویناوو کې په افغانستان کې د بشري حقونو او په تېره د ښځو او نجونو د بشري وضعیت په اړه سخته اندېښنه وښوده.
د بشري حقونو په شورا کې د اروپايي ټولنې استازي میکېلې چیروونې دې اورسو Michele Cervone D’Urso هغه څه چې ده په افغانستان کې د بشري حقونو سیستماتیکه سرغړونه وبلله وغندل او ویې ویل چې د طالبانو له خوا د ښځو پر وړاندې جنسیتي تبعیض ښايي په جنسي ځورونه بدل شي او دا موضوع د روم د اساسنامې پربنسټ د بشريت پرضد جنایت بلل کېږي.
افغانستان په ۲۰۰۳ کال کې د روم اساسنامه لاسلیک کړه خو طالبانو په وروستیو کې اعلان وکړ چې دې تړون ته ځان ژمن نه بولي. ښاغلي دې اورسو وویل"د امربالمعروف او نهی عن المنکر په نوم قانون ښيي چې د تبعیض شدیده بڼه د طالبانو د عمومي ایډیالوژۍ او رسمي پالیسۍ اصلي برخه ده. دا قانون د ښځو پر وړاندې د جنسیت پربنسټ تشدد زیاتوي، له ټولو ښځو د تعلیم، د بیان د آزادۍ، د سوله ایزو غونډو او ټولنو د جوړولو، تګ راتګ او کار حق اخلي او د ټولنیز ژوند په ټولو برخو کې د ښځو او نجونو بامفهومه او خوندي ګډون محدودوي."
برتانیا پر طالبانو د نړیوالې ټولنې د فشارونو د دوام پر اړتیا ټینګار وکړ او پر نجونو او ښځو محدودیتونو ته د اشارې په ترڅ کې یې وویل چې د هېواد په طبي تعلیمي موسسو کې د نجونو پر زده کړو بندیز وېروونکی اقدام دی.
د برتانیا په اعلامیه کې راغلي دي چې طالبان باید دا محدودیتونه چې غیرانساني بلل شوي، لغو کړي څو د ټولو افغانانو روښانه راتلونکې یقیني شي.
ریچارډ بینیټ په دې غونډه کې وویل چې په افغانستان کې د ښځو له حقونو د پراخو سرغړونو ترڅنګ نارینه هم د طالبانو د محدودیتونو پر وړاندې د خپلو کورنیو د ښځو د ملاتړ له کبله شکنجه کېږي"تقریبا هره اونۍ د افغانانو پیغامونه او عکسونه ترلاسه کوم چې د طالبانو له ناوړه چلند څخه شکایتونه لري. په دې عکسونو کې د دوی پر بدنونو هغه نښې ښکاري چې د خپلو ښځینه خپلوانو له دفاع وروسته طالبانو وهلي دي او یا یې کله ناکله نیولي دي."
بینیټ چې د پنجشنبې په ورځ یې د افغانستان د بشري حقونو د وضعیت په اړه خپل راپور د بشري حقونو د شورا غونډې ته وړاندې کړ وویل چې د افغانستان د بشري بحران د حل لپاره ټول نړیوال مسوولیت لري او باید هڅې وکړي.
ښاغلي بینیټ د خپل راپور د وړاندې کولو پرمهال وویل چې په نړیواله ټولنه کې د نظر د یووالي نه شتون طالبان نور هم زړور کړي دي.
د بشري حقونو د څار سازمان د بینیټ د راپور او همداراز په افغانستان کې د بشري حقونو د سرغړونو د مستندولو هرکلی کړی او ویلي یې دي چې ښايي ګڼې دا سرغړونې د نړیوالو جنایتونو په توګه وپېژندل شي. د بشري حقونو د څار د سازمان څېړونکې فرشتې عباسي آزادۍ راډیو ته وویل"هغه په خپل دې راپور کې د افغانستان له مدني ټولنو سره په همغږۍ کې د ملګروملتونو د بشري حقونو له شورا غوښتي چې د افغانستان لپاره یو جامع او خپلواک میکانیزم جوړ کړي. له نېکه مرغه د بشري حقونو د څار سازمان له هغو بنسټونو څخه دی چې د دې غوښتنې ملاتړ کوي."
د طالبانو حکومت ادعا لري چې په افغانستان کې بشري حقونه، په تېره د ښځو او نجونو حقونه د اسلامي شریعت په چوکاټ کې خوندي دي خو ښاغلي بینیټ په خپل راپور کې ویلي دي چې د امربالمعروف او نهی عن المنکر د قانون د تطبیق او د طالبانو د حکومت د اقداماتو له لارې د جنسیټ پربنسټ سیستماتیک ظلم پراخ او بنیادي شوی دی.
د بینیټ د راپور له مخې داسې یو وضعیت د نړۍ په هېڅ هېواد کې ساری نه لري او د بشريت پرضد جنایتونو ته یې لاره پرانیستې ده.