ټاکل شوې د اوو تنو افغان هنرمندانو د اثارو ډیجیټلي نسخې په جرمني کې مېشت د یو غیر انتفاعي سازمان په همکارۍ تر راتلونکو څو ورځو پورې په یو ځانګړي ماموریت کې سپوږمۍ ته واستول شي.
"په داسې وخت کې چې په افغانستان کې د ژوند او مینې هنر منع دی، موږ د افغانستان غږ د هنر له لارې سپوږمۍ ته استوو، دا کولای شي د مینې د پایښت او افغانستان د کلتور لپاره د استقامت پیغام واوسي."
دا هنرمند، د هنرمندانو د حقونو فعال او په جرمني کې د بوم ازادي بنسټ مشر یما رحیمي دی.
ټاکل شوې تر راتلونکو څو ورځو د ده او یو شمیر نورو هنرمندانو هنري اثار په جرمني کې د مېشت یو غیر انتفاعي سازمان په همکارۍ سپوږمۍ ته واستول شي.
یما رحیمي د چهارشنبې په ورځ د فبرورۍ په ۲۶ ازادی راډیو سره خبرو کې وویل چې د دغو هنرمندانو اثار د ده په مدیریت د بوم ازادي بنسټ لخوا راټول شوي دي"هغه مهال چې ما له لوما او لون سټار سره د ازادي ماموریت لپاره کار کاوه زما لپاره دا مهمه وه چې باید قوي اثار وي او خپله هنرمندان هم د هنر او مقاومت بېلګې واوسي، هغه مهال دقیق معلوم نه وو چې د دوی په کارونو سره به څه کېږي، هغه څه چې ما ته مهم دي په دې برخه کې یې ژمنتیا، تجربه او د کلونو فعالیت و، دغو هنرمندانو له دې مخکې د بیان ازادۍ لپاره او د هنر له لارې د تجربو د شریکولو په برخه کې فعالیتونه کړي دي نو له همدې امله د اثارو د اغیزناکتیا او اصالت له مخې غوره شوي دي."
د ښاغلي رحیمي په خبره، د دغو اوو تنو هنرمندانو پېژندنه او د اثارو ټولګه په یو هاردډیسک کې ځای پر ځای شوي چې په کې نقاشۍ، عکاسې، مجسمه او د میکس میډیا «ترکیبي هنر» شامل دي.
ښاغلی رحیمي وايي چې د بوم ازادي بنسټ په کلتوري او هنري برخو کې د افغان هنرمندانو له وړتیاوو په استفادې رامینځته شوی او په خبره یې، دا پلټفارم د نړۍ له ګوټ ګوټه افغانانو ته د دې فرصت برابروي چې خپل کارونه او کیسې پرته له سانسوره شریکې کړي او خپل کلتوري هویت وساتي.
یما رحیمي،مریم غلام علي، تمنا بارکزۍ، ایت الله احمدي، جهان ارا رفیع، محمد طارق حبیبي او ویس الدین محمدي هغه هنرمندان دي چې ټاکل شوې هنري اثار یې د روانې میلادي میاشتې په پای کې سپوږمۍ ته واستول شوي.
له دې ډلې معاصرې هنرمندې مریم غلام علي ازادي راډیو ته وویل"زه خوشحاله یم او ویاړم چې په دې تاریخي او هنري پېښه کې ونډه لرم، د افغانستان هنر اوس د نړۍ د تاریخ او تر هغه لوړ ان په سیارو کې د بشر د راتلونکي برخه ګرځېدلې، دا ماموریت نړۍ ته دا ښیي چې که څه هم په ځمکه کې زموږ کیسې له ننګونو سره مخ شوي خو په فضا کې به تلپاتې وي، موږ نن له پولو، سانسور او محدودیتونو لوړ یو، زموږ هنر لا هم خلقېږي او ژوندی دی."
نقاش او طراح محمد طارق حبیبي چې ډېری هنري اثار یې په افغانستان کې د طالبانو تر واک لاندې پر ښځو د لګول شویو محدودیتونو په اړه دي هم ازادي راډیو ته یې وویل"زما اثار په افغانستان کې پر ښځو د فشارونو او محدودیتونو په اړه وو، بل د افغانستان د خلکو ستونزې ،غمونه او ټولنیز موضوعات په کې شامل دي،هڅه مې وکړه هغه اثار وي چې د افغانستان اړوند دي زه کولای شم ووایم د بوم د ازادۍ بنسټ ثابته کړه چې هنر پوله نه لري، ان له ځمکې هاخوا هم کار وکړپ او نندارې ته یې وړاندې کړي."
ویل شوي چې دا هنري اثار په ډیجیټلي بڼه د هغې هنري ټولګې برخه ده چې ټاکل شوې د Lone Star شرکت لخوا چې د سپوږمۍ په کچه یې د معلوماتو د ذخیره کولو مرکز رامنځته کړی، سپوږمۍ ته واستول شي.
د LUMA هنري ارشیف چې سپوږمې ته د انتقال لپاره د دې ټولګې د راټولو مسولیت لري، د دې اثارو ډیجیټل بڼه به یې په خپل وېب پاڼه هم نندارې ته وړاندې کړي.
د دغه ماموریت د یوې برخې په توګه، د هنري فایلونو ډیجیټلي بڼه به د فبرورۍ په وروستیو کې د Falcon9 توغندي په وسیله د spaceX شرکت لخوا سپوږمۍ ته وتوغول شي.
دا ماموریت چې د “ازادي” ( Freedom) په نوم یادېږي، د لونل سټار ډیټا (Lone Star Data) لخوا جوړ شوی دی.
د ډیجیټلي هنري اثرونو سربېره به، Lone Star د سپوږمۍ په اړه د انسانانو د پوهې او معلوماتو ټولګه هم په سپوږمۍ کې ذخیره کړي ترڅو په ځمکه کې د طبیعي پیښو له امله یې د ضایع کیدو مخه ونیول شي.