د طالبانو د کورنیو چارو وزارت ویاند عبدالمتین قانع د چهارشنبې په ورځ ازادي راډیو ته وویل چې دوی یې "د ځینو ملاحظاتو له مخې" نیولي او په خبره یې هڅه کوي ژر یې ستونزه حل او خوشې شي.
له تېرو څو ورځو راهیسې په دې اړه ګڼ راپورونه خپاره شول او له خلکو سره دا پوښتنې وې چې دا جوړه څوک ده او په کومو کارونو بوخته وه.
"دوی دواړه د ظاهر شاه له دورې وروسته په افغانستان کې دي."
د بامیانو ولایت یوه اوسېدونکې ده چې وایي، دغه بریتانوۍ جوړه د «ریبلد» په نوم بهرنۍ موسسې کارکوونکي دي.
دې چې نه یې غوښتل د موضوع د حساسیت له امله یې نوم په راپور کې خپور شي، ازادي راډیو سره یې خبرو کې وویل " افغان تذکرې او تابعیت لري، دواړه پښتو او دري ژبې یې زده کړي، دومره وخت یې کابل کې فعالیت کاوه خو له تېرو دوو کلونو راهیسې د بامیانو یکاولنګ ولسوالۍ ته راغلي، دلته یې شخصي کور اخیستی."
دوی دلته د ژوند د سټایل روزنې تقویتي ټولګي جوړ کړي، خو دا یې یوازې یکاولنګ کې جوړ کړي،ډاډه یم چې د دوی فعالیتونه ډېر مهم دي
دا میرمن زیاتوي "دوی دلته د ژوند د سټایل روزنې تقویتي ټولګي جوړ کړي، خو دا یې یوازې یکاولنګ کې جوړ کړي،ډاډه یم چې د دوی فعالیتونه ډېر مهم دي، خصوصا هغو ماشومانو لپاره چې لرې پرتو سیمو کې دي او تعلیم ته یې لاسرسی سخت دی،خودلته فعالیتونه محدود وو."
یو شمیر نړیوالو رسنیو راپور خپور کړ، چې طالبانو دا بریټانیوي جوړه د فبروري په لومړۍ نېټه په بامیانو ولایت کې خپل کورته د ستنېدو پر مهال نیولي ده.
بي بي سي سره خبرو کې یو طالب چارواکي ادعا کړې وه، چې دا کسان شل ورځې مخکې ورسته له هغه ونیول شول چې د بامیانو د پولیسو قومندانۍ یا د سرحدي امنیتي ځواکونو له خبرولو پرته یې له الوتکې ګټه اخیسته.
خو بریټانیوي رسنۍ دیلیي میل د دوی د نیولو علت «میندو ته د ماشومانو د روزنې مهارتونو ورزده کول» بللي دي.
د طالبانو حکومت د کورنیو چارو وزارت وایي ۷۹ کلن پیټر رینولدز او د ۷۵ کلنې مېرمن باربي رینولدز لا هم له دوی سره دي او زیاتوي چې دوی سره یې دوه نور کسان هم نیولي دي.
د دغه وزارت ویاند عبدالمتین قانع د چهارشنبې په ورځ په دې اړه ازادي راډیو ته وویل:
"موږ تاییدو چې دا کسان مو نیولي، دوی څلور کسان دي، د ځېنو ملاحظاتو له مخې مو نیولي او هڅه روانه ده چې د دوی ستونزه حل شي، دوه بریټانویان دي چې ښځه او خاوند دي او پاسپورټونه او تذکرې یې افغاني دي، یو چینایي الاصله مریکایي دی او یوه یې هم ترجمان دی."
ښاغلي قانع دا ونه ویل چې د کومو ملحوظاتو له مخې یې دغه کسان نیولي دي.
د یادې بریټانیوي الاصله جوړې اولادونو بیا سکای نیوز سره خبرو کې ویلي چې طالبانو دوی له تېرو درې اونیو (د دلوې له ۱۳نېټې) راهیسې نیولي دي.
دوي ویلي چې پلار او مور یې په ۱۹۷۰ کال په کابل کې واده کړی و او له تېرو ۱۸ کلونو راهیسې افغانستان کې اوسېږي.
د یادونې ده چې چې تر اویا کلونو زیات عمر لرونکې دغه جوړه، له تېر ۲۰۰۹ کال راهیسې د «ریبلد» په نوم موسسې له لارې افغانستان کې په بېلابېلو روغتیایي، تعلیمي او رغنیزو برخو کې کار کوي.
د بامیان ولایت د یکاولنګ ولسوالۍ اوسېدونکي نصیر وایي که څه هم له یادې جوړې سره یې له نژدې نه دي لیدلي خو ټینګار کوي چې په بېلابېلو بشري برخو کې یې فعالیتونه ورته خورا مهم او د دوی پر ژوند اغیزناکه دي"دوی دلته د جنورۍ تر لومړۍ نېټې کار کاوه، خو چې بهرنۍ مرستې بندې شوې کارونه یې تر هغه وروسته بند شول، که څه هم دوی نسبي کار کړی خو بیا هم خلک ډېر کار ته اړتیا لري، دلته موږ کلیو کې روغتیایي خدمتونو او ګڼو نورو اسانتیاوو ته اړتیا لرو نو د دغه ډول موسسو فعالیت موږ ته ډېر مهم دی."
د «ریبلد» موسسې د وېب پاڼې د معلوماتو له مخې، د دوی مرکزي دفتر کابل کې دی، راجستر شوی او دا مهال د افغانستان په بېلابېلو ولایتونوکې ټول ۳۰ کسه کارکوونکي لري.
د ریبلد د معلوماتو له مخې، په ۲۰۲۱ کال پر افغانستان د طالبانو له واکمنېدو وروسته د دغې موسسې د نژدې ټولو کارکوونکو کار پایته ورسېده خو په ټکو یې د دې موسې مشران (دغه بریټانیوي جوړه) بیا هم له افغانستانه ونه وتل.