په ویانا کې د طالبانو د حکومت مخالفو څیرو له نړیوالې ټولنې غوښتي چې په افغانستان کې د یوه " عبوري یا لنډمهالي حکومت" له جوړېدو سره مرسته وکړي.
دغو مخالفو څېرو پرون چهارشنبه د ویانا بهیر پنځمه غونډه د یوې اعلامیې په خپرولو سره پای ته ورسوله.
په اعلامیه کې چې ګڼ شمېر افغان رسنیو خپره کړې راغلي چې نړیواله ټولنه باید د طالبانو په وړاندې " د افغانستان د خلکو مبارزه او هوډ" په رسمیت وپیژني.
دوی دغه راز ویلي چې د افغانستان د راتلونکې لپاره یې دلارې نقشه برابره کړې چې اډانه کې یې سیاسي راتلونکې، نړیوالې اړیکې، بشري حقونه او اقتصادي مسلې رانغښتل شوې دي.
طالبانو د غونډې پر اعلامیې تبصره نه ده کړې، خو د دوی د حکومت ویاند ذبیح الله مجاهد دوه ورځې وړاندې دغه غونډه تکراري او بې ګټې بللې وه.
مجاهد ویلي و چې د غونډې ګډونوال جګړه غوښتونکي او دسیسه جوړونکي دي.
د ویانا د غونډې مهم ګډونوال د ملي مقاومت په نوم جبهې مشر احمد مسعود او د افغانستان د ازادۍ جبهې په نوم د طالبانو د مخالفې ډلې مشر محمد یاسین ضیا دی.
پر دوی سربیره لسګونه نورو سیاسي څېرو، د پارلمان پخوانیو غړو او د بشري حقونو او ښځو فعالانو په غونډه کې چې دوه ورځې یې دوام وکړ، برخه اخیستې وه.