ښاغلي روبیو د شنبې په ورځ پر خپله ایکس پاڼه ولیکل چې که په افغانستان کې نور امریکايي بندیان هم وي نو امریکا به د طالبانو د لوی مشر ملاهبت الله آخوندزاده پرسر هومره لویه جایزه اعلان کړي چې د القاعده د مشر اسامه بن لادن پرسر تر اعلان شوې جایزې به هم لوړه وي.
په قطر کې د طالبانو سفیر نن پر خپله ایکس پاڼه ولیکل چې د دوی د حکومت پالیسي دا ده چې مسایل له سوله ایزې لارې حل کړي خو ښاغلي شاهین په عین حال کې زیاته کړه چې که خبره د زور او فشار وي، نو په تېرو څو لسیزو کې د افغانانو جهاد د ده په وینا هغه درس دی چې ټول باید زده کړه ترې وکړي.
ښاغلي شاهین نن دوشنبې د قطر په منځګړتوب په افغانستان کې د کاناډايي وګړي دیوید لاوېري له بنده خوشې کېدل له نړیوالو سره د طالبانو د تفاهم یوه بېلګه وبلله.
تېره اونۍ د طالبانو او امریکا ترمنځ د اسیرانو د تبادلې په ترڅ کې په امریکا کې د یوه افغان بندي خان محمد په بدل کې دوه تنه امریکايي بندیان راین کوربیټ او ویلیم مککینټي آزاد شول.
