د دې پېښې عیني شاهدان وایي، بریدګر د خلکو په لور موټر وروستو او بیا یې پر خلکو ډزې وکړې.
د امریکا د فدرالي تحقیقاتي ادارې (FBI) په وینا دا ۴۲ کلن بریدګر شمس الدین جبار نومېده. دی په ۲۰۰۷ کال کې د امریکا له پوځ سره یوځای شوی و او په ۲۰۰۹ او ۲۰۱۰ کلونو کې یې په افغانستان کې هم د امریکا د پوځ په لیکو کې دنده ترسره کړې وه.
د امریکا د متحد ایالتونو ولسمشر جو بایډن ویلي دي چې بریدګر د اسلامي دولت (داعش) له ډلې الهام اخیستی دی.
د بریدګر په موټر کې د داعش بیرغ هم موندل شوی او دی په خپله له پولیسو سره د ډزو پرمهال وژل شوی دی.
ولسمشر جو بایډن ویلي چې د امریکا فدرالي پولیسو داسې ویډیوګانې موندلي چې بریدګر تر برید مخکې په خواله رسنیو کې خپرې کړې دي، او په دې ویډیوګانو کې یې داسې ښکاره کړی چې دی غواړي ځان ووژني.
د اسوشیتد پریس خبري اژانس د امریکا د فدرالي تحقیقاتي ادارې په حواله ویلي چې د بریدګر او د برید د څرنګوالي په اړه څېړنې روانې دي. دا اداره زیاتوي چې بریدګر په موټر کې د پولیسو له محاصرې نه تېر شوی او مخکې له دې چې پولیس یې مخه ونیسي د خلکو پر ګڼه ګوڼه یې موټر وروستی دی.
د اسوشیتد پریس د راپور له مخې پولیسو ویلي چې څارنوالانو یو اندازه چاودېدونکي مواد، دوه انفجاري وسیلې، چې د لرې واټن نه د چاودنې لپاره ځای پر ځای شوې وې، موندلي دي.
دا برید، چې په کې شااوخوا دېرش تنه ټپیان شوي هم دي، د نوي کال د جشن په لومړیو ساعتونو کې د بورین په واټ کې شوی دی. دا سیمه په نیو اورلینز کې تفریحي او د ګرځندویانو د ګڼې ګوڼې سیمه ده.
د برید کوونکي د برید له امله دوه پولیس هم ټپیان شوي، خو د دوی روغتیايي وضعیت ښه ښودل شوی دی.
بل لور ته، پرون د امریکا په لاس ویګاس ښار کې د یوې چاودنې له امله یو تن وژل شوی او اووه کسان ټپیان شوي.
د راپورونو له مخې دا چاودنه د ټیسلا شرکت په یوه برقي موټر کې د امریکا په منتخب ولسمشر ډونالډ ټرمپ پورې اړوند د یو هوټل مخې ته شوې ده.
ولسمشر جو بایډن ویلي چې د امریکا فدرالي تحقیقاتي اداره (FBI) د دې موضوع تحقیق کوي چې دا چاودنه د نیو اورلینز له پېښې سره څه تړاو لري کنه.
تر اوسه روښانه نه ده چې دا چاودنه د تخنیکي ستونزې له امله شوې که یو تروریستي برید دی. د ټیسلا شرکت څښتن ایلن ماسک په ټویټر کې لیکلي دي چې دا چاودنه د موټر د تخنیکي مشکل له امله نه ده رامنځ ته شوې.