په میدان وردګو په ولایت کې د نوري فایبر د ۲۴۸ میلیونو افغانیو پروژه په رسمي توګه پیل شوه.
په دغه ولایت کې د طالبانو د مخابراتو ريیس قاري نور اغا معصب وویل، د دې پروژې له عملي کېدو سره به هغه شکایتونه حل شي، چې وړاندې یې د انټرنیټ د ضعیف فعالیت په اړه مطرح شوي وو.
د هغه په وینا، دا پروژه به د خلکو لپاره په مختلفو برخو کې د انټرنیټ اسانتیاوې برابرې کړي.
نوموړی وايي: "د دې فایبر لاین له لارې به د میدان وردګو اوسېدونکي د انټرنیټ په برخه کې له نويو اسانتیاو برخمن شي."
د شرکت مسوول محمد عمري دراني وویل، دغه نوري فایبر به نه یوازې د انټرنیټ کیفیت ښه کړي، بلکې له زرو څخه زیاتو کسانو ته به د کار زمینې هم برابرې کړي.
نوموړي دا هم وویل چې، دا پروژه د سیمې د اوسېدونکو لپاره یو لوی پرمختګ دی او هغوی به لهدې لارې له معیاري او باوري انټرنیټ څخه برخمن شي.
هغه وايي: "موږ ژمن یو چې د دې فایبر لاین په مرسته به د سیمو خلکو ته ښه کیفیت لرونکي انټرنیټي خدمتونه وړاندې کړو."
د شرکت انجينر سیفالرحمان هم د دې پروژې په تخنیکي اړخونو رڼا واچوله او زیاته یې کړه چې دا پروژه د نوې ټکنالوژۍ پر اساس طراحي شوې او د ټولو سټنډرډونو سره برابره ده.
نوموړي وویل: "دا فایبر لاین د نوې ټکنالوژۍ پر اساس طراحي شوی او د نړيوالو معیارونو په مطابق دی."
دا نوښت به په میدان وردګ او بامیانو کې د انټرنیټ په برخه کې لوی بدلون رامنځته کړي، چې له امله به د دواړو ولایتونو اوسېدونکي له نوري فایبر څخه برخمن شي.
