د ایران حکومت پنځه افغانان اعدام کړي چې دوه په کې ورونه دي.
څلور افغانان د ایران په مشهد ښار کې او یو په تبریز کې اعدام شوی دی.
د "حال وش" ویبپاڼه چې د بشري حقونو په اړه راپورونه ورکوي، څرګندوي چې دا څلور افغانان د پنجشنبې په ورځ د وکیل اباد په زندان کې اعدام شول.
په راپور کې راغلي چې زمان طاهري، سلام طاهري، غلام قادر ساماني او ابراهیم نورزی د مخدره موادو په تړاو مخکې په اعدام محکوم شوي وو.
دا ویبپاڼه زیاتوي چې دا څلور کسان د چهارشنبې په ورځ له عمومي بند څخه انفرادي خونو ته انتقال شول او د پنجشنبې په سهار اعدام شول.
د ایران د بشري حقونو سازمان نن په یوه راپور کې ویلي چې د ولي الله په نوم یو افغان د تبریز په مرکزي زندان کې د عمدي قتل په تور اعدام شو.
د بشري حقونو د دفاع تر اتیا ډېرو نړیوالو او ایراني بنسټونو یوه اوونۍ مخکې غوښتنه کړې وه چې د ملګرو ملتونو له جرمونو او مخدره موادو سره د مبارزې دفتر دې له ایران سره همکاري مشروطه کړي.
دوی وایي چې له ایران سره دې یوازې په هغه صورت کې همکاري ادامه پيدا کړي چې دا هېواد د مخدر موادو په تړاو له اعدامونو لاس واخلي.
د بشري حقونو د دفاع بنسټونو په خپل ګډ بیان کې چې د اپرېل په لسمه یې خپور کړ ویلي چې په ایران کې د مخدره موادو په تور د اعدامونو پر وړاندې په نړۍ کې لازم او مناسب غبرګون نه دی ښودل شوی او رسنیو هم پر دغو اعدامونو خوله پټه کړې چې له امله یې په ایران کې د درې کاله پخوا په پرتله د مخدر موادو د جرمونو په خاطر اعدامونه اتلس برابره زیات شوې دي.
د بخښنې نړیوال سازمان وایي، په ۲۰۲۳م کال کې په ایران کې اته سوه درې پنځوس کسان اعدام شوې چې د وړم ۲۰۲۲م کال په پرتله نژدې ۵۰ فیصده زیاتوالی ښيي.
د بشري حقونو ډلې د ایران په محکمو دا اعتراض کوي چې تورنو کسانو ته په ازادانه توګه اجازه نه ورکوي چې خپل مدافع وکیل وټاکي.