نړۍ
په ایران کې له زرو تر دوو زرو کسان د مخدره موادو د خرڅلاو په تور په اعدام محکوم شوي

د ایران د پارلمان یو غړی وايي، له زرو تر دوو زرو کسان د لرستان ولایت په دلفان ولسوالۍ کې د مخدره موادو د خرڅلاو په تور په اعدام محکوم شوي دي.
یحیی ابراهیم په هغې ویډیو کې چې په ټولنیزو شبکو يې خپره کړې، وايي، د دغو کسانو د کورنیو سره د کتنې پر مهال ورته معلومه شوې چې دا کسان د اعدام له حکم سره مخامخ دي.
د پارلمان د دې غړي د څرګندونو دقیق وخت معلوم نه دی، خو د ایران کورنیو رسنیو د هغې ډلې د اطلاعاتو روز ویبپاڼې پرون دا خبر ورکړی دی.
په پارلمان کې د دلفان استازی ویلي، په روانه اوونۍ کې يې په دلفان کې د هغو زندانیانو له کورنیو سره چې په اعدام محکوم شوي کتلي دي.
د پارلمان د دې غړي په خبره، په دغې ولسوالۍ کې په اعدام د محکومو شویو کسانو شمېر ډېر لوړ دی.
د ورځې تازه خبرونه دلته ولولئ
د امریکا او روسیې مشران په الاسکا کې سره ګوري

ټاکل شوې ده چې د امریکا او روسیې ولسمشران د جمعې په ورځ په الاسکا کې غونډه وکړي.
د روسیې تاس اژانس نن د ولسمشر ولادیمیر پوتین د بهرنۍ تګلارې د سلاکار یوري اوشاکوف په وینا د دې سرمشریزې د ځای او نیټې په اړه دا معلومات ورکړل.
د دوه زره یو ویشتم کال په جون کې د روسیې ولسمشر پوتین د امریکا له پخواني ولسمشر جو بایډن سره په جینوا کې لیدلي و، تر دې وروسته دا لومړی ځل دی چې د روسیې او امریکا مشران مخامخ سره کښیني.
څلور ستوز مزلي مځکه ته ستانه شول

د ناسا د کریو-۱۰ ډله چې څلور ستورمزلي پکې شامل وو د جمعې په ورځ (د اګست ۸مه) د سپیس ایکس ډریګن کیپسول په واسطه له نړیوال فضايي سټیشن څخه ووتله او نن سهار (د اګست ۹مه) له پنځه میاشتني ماموریت وروسته ځمکې ته ښکته شوه.
د امریکا ستورمزلي نیکول ایرز او ان مک کلین، د جاپاني ستورمزلي تاکویا اونیشي او روسي ستورمزلي کیریل پیسکوف سره یوځای، د کالیفورنیا ساحل ته له اوولس نیم ساعته سفر وروسته ورسیدل.
د څلورو کسانو دغه ډله د مارچ په ۱۴مه نړیوال فضايي سټیشن ته تللې وه.
په چین سیلونو لسګونو کسانو ته مرګ ژوبله اړولې

د چین د شمال لویدیځ ګانسو ولایت په یوژونګ ښار کې د سیلابونو له امله لږ تر لږه ۱۰ کسان وژل شوي او ۳۳ نور تري تم دي.
د چین دولتي نشراتي ادارې سي سي ټي وي راپور ورکړی چې د پنجشنبې په ورځ سخت بارانونه په غرنیو سیمو کې د سیلابونو او ځمکې ښویدنې سبب شول.
د چین ولسمشر شي جین پینګ د ژغورنې او سیلاب مخنیوي لپاره د پراخو هڅو غوښتنه کړې ده.
د فرانسې په ځنګلونو کې لګیدلی اور کنټرول شوی

چارواکي د فرانسې په جنوب کې خبرداری ورکوي چې له سې شنبې راهیسې په ځنګلونو کې لګیدلي اورونه ښایي د تودې هوا له امله بیرته خپاره شي.
چارواکو نن وویل چې دا اورونه نن کنټرول شوې دي خو د دې لپاره چې هوا په سیمه کې د سانتي ګرید تر دیرش درجو لوړه ده، دا ویره شته چې بیرته د اور لمبې خپرې شي.
دا اورونه چې شاوخوا یوسل و شپیته کیلومتره مربع ساحه یې نیولې وه، د یوه کس ژوند یې واخیست، لږ تر لږه یو ویشت تنه یې ټپيان کړل او د نژدې شپږ دیرش کورونو د سوځیدو سبب شول.
د فرانسې په جنوب کې دا اورلګیدنه په تیرو څو لسیزو کې بیساری بلل شوې ده.
د برتانیې پولیس د پاکستان د کرکټ دملي ټیم د یوه غړي په هکله چې په جنسي تیري تورن دی تحقیقات کوي

د برتانیا پولیس د پاکستان د کرکټ د ملي ټیم د غړي حیدر علي په اړه چې د جنسي تیري تور پرې لګیدلی دی تحقیقات کوي.
د مانچسټر پولیسو د حیدر علي نوم پرته رویټرز ته وویل چې دوی د اګست په څلورمه نیټه یو ۲۴ کلن سړی د جنسي تیري شکایت ترلاسه کولو وروسته ونیولو.
پولیسو وویل چې سړي د جولای په ۲۳ مه نیټه په یوې میرمنې جنسي تیری کړی دی.
پیښه برتانیې ته د پاکستان الف کرکټ ټیم د سفر په جریان کې رامنځته شوې.
د پاکستان کرکټ بورډ وویل چې حیدر علي د تحقیقاتو تر بشپړیدو پورې د هیواد د کرکټ ټیم څخه وځنډول شو.
د اسرائیلو امنیتي کابینې د غزې ښار د بشپړو نیولو پلان تصویب کړ

د اسرائیلو د صدراعظم بنیامین نتنیاهو دفتر وایي د هیواد امنیتي کابینې د غزې ښار د بشپړ نیولو پلان تصویب کړی دی.
دا اقدام، چې د جمعې په سهار اعلان شو، د ۲۲ میاشتنۍ جګړې د پراختیا یوه بله نښه ده.
بنیامین نتنیاهو مخکې ویلي وو چې د حماس د له منځه وړلو لپاره، اسرائیل باید ټوله غزه ونیسي او وروسته یې "دوستو عربي ځواکونو" ته وسپاري.
اسرائیل اوس د غزې ډیره برخه ترکنټرلاندې لري.
اسوشیټیډ پریس راپور ورکړی چې د غزې بشپړ اشغال کولی شي د بې شمیره فلسطینیانو او د حماس لخوا نیول شوي شاوخوا ۲۰ یرغمل کسانو ژوند له خطر سره مخامخ کړي، او اسراییل په نړیواله کچه نور هم منزوي کړي.
متحده ایالات او اروپايي اتحادیه حماس یوه "ترهګره ډله" ګڼي.
هند په اسام ایالت کې یوشمیر خلکو ته د وسلو د لیږد اجازه ورکوي

د هند د اسام ایالت اعلان کړی چې دوی به له بنګله دیش سره د سرحدي سیمو خلکو ته د وسلو اجازه ورکړي.
د فرانس پریس اژانس د راپور له مخې د اسام اعلی وزیر هیمانتا بسوا سرما، چې د هندو ملتپال بي جي پي ګوند غړی دی، د چهارشنبې په ورځ وویل چې هغه ځایي اوسیدونکي چې ګواښ احساسوي اوس کولی شي د ایالت ویب پاڼې له لارې د وسلو جوازونو لپاره غوښتنه وکړي.
دې اقدام د ایالت د مسلمان اقلیت ترمنځ اندیښنه راپارولې ده.
د اسام شاوخوا ۳۱ ملیون نفوس له ۳۵ سلنې څخه ډیر بنګالي ژبي مسلمانان دي. ډیری یې اندیښنه لري چې دا پریکړه به د تاوتریخوالي د زیاتوالي او د دې سبب شي چې مسلمانان په نښه شي.
د اپوزسیون ګوندونو په شمول د دې پریکړې منتقدین وایي چې عامو خلکو ته د وسلو د جواز ورکول به د شخصي غچ اخیستو او قومي شخړو لامل شي.
په واڼه کې د پولیسو پر موټر چاودنه شوې

د خیرپښتونخوا په واڼه ښار کې د سړک د غاړې بمي چاودنې د چارواکو په وینا دوه پولیس وژلي او څوارلس تنه نور یې چې اکثر یې لارویان وو، ټپيان کړې دي.
دا چاودنه د چهارشنبې په ورځ وشوه.
د سیمه ییزو پولیسو د مشر په وینا، بم هغه مهال وچاودید کله چې د پولیسو موټر په ګزمې روان و.
په وروستیو اونیو کې، په پاکستان کې د یاغیانو بریدونه زیات شوي، چې لسګونه پاکستاني امنیتي ځواکونه یې وژلي دي.
په عین حال کې، د پاکستان حکومت د باجوړ په سیمه کې د پوځي عملیاتو د پیلولو لپاره چمتووالی نیسي، چیرې چې قومي مشران هڅه کوي د نښتو مخه ونیسي.
که څه هم په واڼه کې د شوې چاودنې مسوولیت تر دې دمه چا نه دی، خو پاکستاني طالبانو (ټي ټي پي) تر دې مخکې د ډیرو دا ډول بریدونو پړه په غاړه اخیستې ده.
په فرانسه کې د اور وژلو هڅې دوام لري

د فرانسې په جنوب کې د اور وژنې کارکوونکي د پراخ اور د کنټرول هڅې کوي.
دا اور په چټکۍ سره د ځنګلونو او کلیو له لارې خپور شو، چې اوسیدونکي او سیلانیان یې تېښتې ته اړ کړل.
د رویټرز خبري اژانس د راپور له مخې، د اود ولایت چارواکو ویلي چې په دې اور کې یو کس مړ شوی، لږترلږه ۲۵ کورونه سوځلي دي او په سیمه کې ډیری سړکونه تړل شوي دي.
تر اوسه، ۱۴۰۰۰ هکتاره مځکه سوځلې ده.
د اود ولایت چارواکو ویلي چې اور "ډیر په چټکۍ" مخ په زیاتیدو دی او شا او خوا ۲۰۰۰ اور وژونکي د اور د کنټرول هڅې کوي. د معلوماتو له مخې په سیمه کې شاوخوا ۲۵۰۰ کورنۍ اوس مهال له برېښنا بې برخې دي.
په ایران کې د ورځې دوه وار د کورونو برق ځي

د ایران په پلازمېنه کې چارواکي د اوبو د کړکېچ او د دوبي د ګرمۍ له زیاتوالي سره لاس او ګریوان دي، او د اوبو او برېښنا د خوندي کولو لپاره ګامونه پورته کوي.
د تسنیم خبري اژانس په وینا، په تهران کې، حکومت په ورځ کې دوه وار د کورونو برېښنا پرې کوي، چې په په ورځ کې تر څلورو ساعتونو پورې وي.
له دې کبله په ۳۷ درجې تودوښه کې د کورونو ډیری هوایي کولرونه له کاره لویدلي دي.
د تودوښې څپې په داسې حال کې راځي چې دا هیواد د اوبو له سخت کمښت سره مخامخ دی. د اقلیم د کارپوهانو په وینا، د ایران ۸۰ سلنه بندونه تقریبا خالي دي.