ملګري ملتونه وايي، د افغانستان لپاره د ځانګړو استازو دوهمه غونډه جوړوي.
د ملګرو ملتونو د سرمنشي انټونیو ګوټېرېش د ویاند مرستیالې ستېفاني ترمبلي د پنجشنبې په ورځ په نیویارک کې د یاد سازمان په مرکزي دفتر کې په یوه خبري کنفرانس کې که څه هم د غونډې دقیق وخت اعلان نه کړ، خو ټینګار یې وکړ چې د ملګرو ملتونو عمومي منشي د دې غونډې د ترسره کولو لپاره ژمن دی.
د مېرمن ټرمبلي په خبره، دغه غونډه به د لارې د یوې نقشې په اړه د نړیوالې اجماع د رامنځته کولو او د دې سازمان د خپلواکو ارزونو پر وړاندیزونو د بحث لپاره ترسره شي.
د ملګرو ملتونو د سرمنشي د ویاند مرستیالې په دې اړه د خبرو په یوه برخه کې وویل: "زه کولای شم تاسو ته ووایم چې د ملګرو ملتونو سرمنشي دا هوډ لري چې په یو مناسب وخت کې د افغانستان لپاره د ځانګړو استازو دوهمه ناسته ترسره کړي. زه اوس د اعلانولو لپاره دقیق وخت نهلرم او دا د یوې نړیوالې اجماع رامنځته کول دي چې د خپلواکو ارزونو په وړاندیزونو بحث کوي."
د ګوټېرېش د ویاند مرستیالې دا هم ویلي چې د ملګرو ملتونو د ځانګړي استازي فریدون سینیرلي اوغلو ماموریت د افغانستان لپاره د دې سازمان د ځانګړو استازو د غونډې د چمتووالي او د اړوندو رای ورکولو د ملاتړ په موخه د فبرورۍ تر پایه غځول شوی دی.
د افغانستان په اړه د ملګرو ملتونو لومړۍ غونډه د ۲۰۲۳م کال د مې په لومړۍ او دوهمه په دوحه کې د دغه سازمان د سرمنشي په مشرۍ جوړه شوه.
خو د بشري حقونو یو شمېر فعالان نیوکه کوي چې په نړیوالو غونډو کې افغانستان او خلکو ته یې لومړیتوب نه ورکول کېږي.
د بشري حقونو فعالې نیلوفر ایوبي په دې اړه ازادي راډيو ته وویل: "له بده مرغه دا باید ومنو چې د هغو هېوادونو ځانګړو استازو ته چې د افغانستان لپاره ټاکل شوي د خپلو هېوادونو ګټې او سیاست ورته اړین دی او هر یو د خپل هېواد په ګټه په دغه پروګرام کې برخه اخلي او په دې ډاډه اوسئ چې هیڅ یو ته يې افغانستان لومړیتوب نه لري."
دا په داسې حال کې ده چې په دوحه کې د ملګرو ملتونو د سرمنشي انټونیو ګوټېرېش په مشرۍ د افغانستان لپاره د ځانګړو استازو لومړۍ غونډه د طالبانو حکومت د استازو له شتون پرته د تړلو دروازو تر شا جوړه شوې وه، خو دغه سازمان هغه مهال په یوه اعلامیه کې ویلي وو چې د دې ناستې اصلي موخې په افغانستان کې د بشري حقونو په ځانګړي ډول د ښځو او نجونو د حقونو په برخه کې نړیوال تعامل، د یوه ټولشموله حکومت رامنځته کول او له ترهګرۍ او نشه یي توکو سره مبارزه وه.
په دې غونډه کې، د افغانستان لپاره د شاوخوا ۲۵ هېوادونو او نړیوالو سازمانونو ځانګړو استازو ګډون کړی و.
که څه هم د طالبانو حکومت تل پر دې ټینګار کوي چې د افغانستان په اړه په نړیوالو غونډو کې باید دوی ته بلنه ورکړل شي، خو څرګنده نه ده چې د دغه سازمان دوهمه غونډه کې به د طالبانو استازي هم راوبلل شي که نه.
