د افغانستان په غور ولایت کې د درې ساعتونو لپاره په واورو کې یوه لوبغاړي ورزشي نندارې وړاندې کړي دي.
هغه ویلي دي د دې نندارو موخه یې د کارګرو ماشومانو ملاتړ دی.
یاد شوی وزشکار عبدالقاسم فردوسي نومیږي او وايي، نن سبا په زیات تعداد کې ماشومانو د ښوونځیو پر ځای درانه کارونه کوي.
ښاغلي فردوسي ازادي راډيو ته ویلي:
" هیله مند یم چې دغه ډول نندارې یوه پایله ولري او د راتلونکي پسرلي په پيل کې ډيرو ماشومانو ته د زدکړو زمینه برابره شي"
هغه دغه راز له خلکو هیله کړې ده چې له ورزشکارانو ملاتړ وکړي.
د نوموړي په وینا، لوبغاړي ډېرو ښو غذايي موادو ته اړتیا لري، خو په افغانستان کې د خراب اقتصادي حالت له امله دوی ورته لاس رسی نه لري.
عبدالقاسم فردوسي له ډېرو کلونو راهیسې په واورو کې سپورټي نندارې وړاندې کوي، هغه په ۲۰۲۲ ز کال کې توانیدلی و چې ۳۳ دقیقې خپل بدن په واورو کې پټ کړي.
