په داسې حال کې چې د امریکا متحدو ایالتونو بهرنیو چارو وزارت د دغه هېواد د کېس لرونکو افغان کډوالو لپاره په پاکستان کې د ستونزو د پېښېدو پر مهال د بېړنۍ اړیکې شمېره اعلان کړې، یو شمېر افغان پنا غوښتونکي وايي، د دوی ستونزو ته د رسېدو په برخه کې دغه ډول اقدامات بسنه نه کوي او پکاره ده چې د دوی د کېسونو د پړووانو بشپړولو او انتقال پروسه چټکه شي.
په پلازمېنه اسلام اباد کې مېشت یوه افغان پناه غوښتونکي چې امریکا ته د پي ټو کیس لري ازادي راډيو ته وویل:
" که څه هم موږ سره د امریکا له لوري راکړل شوی د خوندیتوب لیک شته خو د نیولو په وخت کې پولیس دغه لیک کې ته هیڅ ارزښت نه ورکوي، دغه شان موږ ته دومره وخت نه راکوي چې موږ د امریکا بهرنیو چارو وزارت ته یا زنګ ووهو او یا د دوی واټس اپ ته مسج وکړو، په دې صورت کې موږ د ډیپورټ له خطر سره مخ کیږو ، نو امریکا باید له پاکستانه زموږ د انتقال پروسه چټکه کړي ځکه افغان پناه غوښتونکي دغلته له سختو ستونزو سره مخ دي. "
په پېښور کې یو بل مېشت افغان پناه غوښتونکي ګل ولي احمدزي ازادي راډيو ته وویل:
" کوم کسان چې امریکا متحده ایالاتو پاکستان ته راغوښتي او دلته د پي یو او پي دوه کېسونه لري، د دوی د انتقال پروسه باید چټکه کړل شي او که دا کار ونه شي د افغان پناه غوښتونکو ستونزې به لا پسې زیاتې شي."
د امریکا د بهرنیو چارو وزارت تېره ورځ په خپل اېکس شبکه یا پخواني ټویټر، په پاکستان کې د مېشتو افغان پناه غوښتونکو لپاره د بېړني ټلیفون شمېره اعلان کړه او ویې ویل، هغه پناه غوښتونکي چې د نیول کیدو او ایستلو له خطر سره مخ کیږي له دې شمېرې سره اړیکه نیولی شي.
دغه وزارت ویلي چې دغه شمېره به په اوونۍ کې شپږ ورځې یوازې له یکشنبې پرته د پاکستان پر وخت د سهار له اتو بجو تر نیمې شپې پورې د ټلیفوني او واټساپ اړیکو لپاره فعاله وي.
متحدو ایالتونو له دې وړاندې په پاکستان کې مېشتو هغه افغان کډوالو ته چې له دې هیواد سره د (SIV،P2 اوP1) کېسونه لري د خوندیتوب لیکونه استولي وو.
د روانې نومبر میاشتې په څلورمه نېټه په استول شویو دغه لیکونو له پولیسو غوښتنه شوې وه چې د دغه لیک لرونکي کډوال چې د امریکا متحده ایالات یې د کیسونو څېړنه کوي باید له دې هېواده ونه اېستل شي.
په پاکستان کې مېشت افغان پناه غوښتونکي وايي چې پاکستاني پولیس د قانوني اسنادو د نه درلودلو په تور د نیولو په وخت دغه لیکونو ته پام نه کوي.
امریکا وروسته له هغې دا اقدام کوي چې پاکستان له دې هېواده د بې اسناده افغان کډوالو د اېستلو لړۍ چټکه کړې ده.
د پاکستان د کورنیو چارو سرپرست وزیر سرفراز بګتي تېره ورځ له انډیپنډنټ اردو څانګې سره په مرکه کې وویل چې په راتلونکې یوه میاشت کې به له دې هېواده د بې اسناده کډوالو د اېستلو پروسه بشپړه شي.
نوموړي وویل، هغه کسان چې د ناامنۍ له وېرې د بشري اړتیاوو له مخې پاکستان ته کډوال شوي باید بېرته افغانستان ته لاړ شي ځکه د ده په خبره اوس افغانستان امن دی.
د روانې نومبر میاشتې له لومړۍ نېټې وروسته د بې اسناده افغان کډوالو د اېستلو په پیل شوې لړۍ کې د ملګرو ملتونو د کډوالو د عالي کمېشنرۍ د معلوماتو پر بنسټ د نومبر تر ۳۲ مې نېټې ۳۹۷۸۰۰ افغان کډوال افغانستان ته ستانه شوي دي.
یو این ایچ سي ار ویلي چې په دې شمېر کډوالو کې تر ټولو ډېر د تورخم له لارې د افغانستان ننګرهار ولایت ته تللي دي.
په همدې حال کې د ملګرو ملتونو سازمان ویلي ډېر هغه افغانان چې له پاکستانه اېستل شوي په افغانستان کې د استوګنې ځایونه نه لري او په سخت ژمي کې به د خوړو د نه خوندیتوب له ستونزو سره مخ شي.
ډبیلو ایف تازه پر خپله اېکس پاڼه لیکلي چې پاکستان په داسې وخت کې له دې هېواده د افغان کډوالو د اېستلو لړۍ تېزه کړې چې په افغانستان کې د کال تر ټولو سخت موسم دی.
د کډوالو په چارو کې د ملګرو ملتونو د عالي کمېشنرۍ (يو ان اچ سى ار) د جمعې د ورځې د خپرو شويو شمېرو له مخې، د سپټمبر له ۱۵مې نیټې څخه د نومبر تر ۲۳مې نېټې پورې له پاکستان څخه شاوخوا ۴۰۰ زره افغان کډوال راستانه شوي چې له دې شمېر ۲۲٨ زره یې د نومبر له لومړۍ نیټې (د اخراج د رسمي بهیر له پیل) وروسته بېرته افغانستان ته راستانه شوي دي.
