د بشري حقونو د څارسازمان د ښځو د حقونو مرستیاله هیدربار وایي، د طالبانو د حکومت چارواکو له کله چې پر افغانستان واکمن شوي، تل له نړیوالو سره د ښه تعامل، مرستو او نورو برخو کې خپلې غوښتنې مطرح کړي، خو له دې سره هممهاله یې پر ښځو هم سختو محدودیتونو لګولو ته دوام ورکړی.
نوموړې د هغو راپورونو په غبرګون کې چې وایي، د قطر صدراعظم افغانستان ته په وروستي سفر کې د طالبانو له مشر سره په پټه کتلي او هغه له انزوا څخه د افغانستان د وتلو لپاره د نوې لېوالتیا نښه ښودلې وایي، دا فکر نهکوي چې دا دې کومه نوې لېوالتیا وي، یوازې نوې خبره پهکې دا ده چې له اخندزاده سره لیدل شوي دي.
هیدربار پرون چهارشنبې په خپله ټویټرپاڼه کښلي، طالبان د ۲۰۲۱ کال د اګست له میاشتې راهیسې تل په لېوالتیا خپلې، د ښکېلتیا یا تعامل، مرستو او د رسمیت پېژندلو غوښتنې مطرح کړي او مبارکۍ ورکوي.
خو له دغو خبرو سره هممهاله په دوامداره توګه د ښځو او نجونو ځپنه دوام لري او لا پراخه شوې.
رویټرز خبري اژانس په یوه راپور کې د ځینو سرچینو په حواله چې نومونه یې نهدي یاد شوي ویلي چې د قطر صدراعظم او د بهرنیو چارو وزیر محمد بن عبدالرحمن الثاني د می په ۱۲مه کندهار ته د سفر پر مهال د طالبانو له مشر ملا هبتالله اخندزاده سره پټې خبرې اترې کړې دي.
د راپور له مخې په دغو محرمو خبرو کې پر دې بحث شوی چې څنګه د طالبانو حکومت له نړیوالې ټولنې سره لانجې پای ته ورسوي.
د راپور له مخې د امریکا د ولسمشر جوبایډن له ادارې سره هم د دغو خبرو جزییات شریک شوي او هغوی له طالب مشرانو سره د دې ډول خبرو د دوام غوښتنه کړې ده.
تر اوسه د قطر حکومت دغه خبرې رسماً نه دي تایید کړي او امریکایي چارواکو هم په دې اړه تر اوسه کومه تبصره نهده کړې.
د بشري حقونو د څار سازمان، هیومان رایټس واچ د ښځو د حقونو مرستیاله هیدر بار دغه خبرو ته په اشاره وایي، دا د اخندزاده لپاره نوې خبره ده چې له بهرنیانو سره خبرې کوي او زیاتوي هغه هم له داسې هېواد سره چې د دوی ډېر نږدې ملګری دی.
هیدربار وایي، دا چې ولې د ۲۰۲۱ کال د اګست له میاشتې راهیسې چې طالبان بیا پر افغانستان واکمن شوي، هېڅ یوه هېواد یې حکومت په رسمیت نهدی پېژندلی، مهم لاملونه یې پر ښځو د زدهکړې او کار په برخو کې د دوی لهخوا لګول شوي محدودیتونه دي چې دې مسئلې د بشري مرستو مخه هم نیولې ده.
له کله چې طالبان واک ته رسېدلي، له شپږم ټولګي پورته یې د نجونو ښوونځي او دغه راز د هغوی پوهنتونونه تړلي او ښځې یې د ملګروملتونو په ګډون کورنیو او نړیوالو مؤسسو کې له کاره منعه کړي دي.
