د ایران او سعودي عربستان استازو د دواړو هېوادونو ترمنځ د اړیکو د ښه کېدو موافقه وکړه.
له تېرو دوو کلونو راهیسې یو ځل عراق او بل ځل عمان د ایران او سعودي عربستان د چارواکو کوربانه وو چې اړیکې یې عادي شي، خو اوس د چین په کوربتوب تهران او ریاض تړون لاسلیک کړ چې په سیاسي او اقتصادي برخو کې به همکارۍ سره کوي.
د ایران او سعودي عربستان تر منځ اووه کاله اړیکې کړکېچنې وې.
د رویټرز اژانس د راپور له مخې دې روابطو چې له دښمنۍ ډک و د فارس خلیج امنیت او ثبات تهدیداوه او د دې سبب شوي وو چې له یمنه تر سوریې شخړې ورسره تودې شي.
د ریاض او تهران ترمنځ د چین په پلازمېنه پیکنګ کې تر څلور ورځنیو خبرو وروسته د جمعې په ورځ د روغې جوړې اعلان وشو.
په دې خبرو کې د ایران او سعودي عربستان جګپوړیو امنیتي چارواکو برخه اخیستې وه.
د هغې ګډې اعلامیې له مخې چې د ایران، سعودي عربستان او چین له لوري خپره شوه ریاض او تهران موافقه وکړه چې ډیپلوماتیک روابط به بېرته پيلوي او د یوه بل په خاوره کې به د دوو میاشتو په ترڅ کې خپل سفارتونه پرانېزي.
سعودي عربستان په ۲۰۱۹م کال کې ایران تورن کړ چې د ظهران د تېلو پر تاسیساتو یې د بې پيلوټه الوتکو بریدونه کړې دي، همداراز یې د تېلو پر کښتیو حملې کړې دي، ایران دا تورونه رد کړي دي.
په یمن کې حوثي وسله وال چې ایران یې ملاتړ کوي بیا بیا یې د سعودي عربستان دننه د بې پيلوټه الوتکو بریدونه کړې دي، حوثیانو پروسږ کال پر متحد عربي اماراتو هم د ډرون حملې وکړې.
د ایران او سعودي عربستان ترمنځ ۲۱ کاله مخکې امنیتي موافقه لاسلیک شوې وه، د نوي تړون له مخې دواړو لوریو ویلي چې دا موافقه به بېرته احیا کوي.
همداراز دغو دوو هېوادونو د سوداګرۍ او پانګونې په برخو کې هم د پخوانیو لاسلیک شویو موافقو د راژوندي کولو ژمنه وکړه.
د سپینې ماڼۍ د ملي امنیت ویاند وویل چې واشنګټن د دې موافقې هرکلی کوي او دا یې هیله ده چې له دې سره په یمن کې جګړې پای ته ورسېږي او په منځني ختیځ کې شخړې راکمې شي.
