له څه مودې راهیسې د طالبانو ځواکونه د ملا مهدي مجاهد په نوم له یوه سیمه ییز قوماندان سره چې له طالبانو ناراضه دی، په خپل منځي جګړو بوخت دي، چې د بشري حقونو د سازمان او ځايي خلکو اندېښنې يې راپارولي دي.
د بشري حقونو د څار سازمان د اسیا د برخې مرستیالې پتریشیا ګاسمن په خپل ټويټر لیکلي: "له بلخاب څخه اندېښمنونکي راپورونه رارسېدلي چې طالبانو د راپورونو په اساس په ولسوالۍ کې د وسله وال مقاومت په غچ کې څو تنه بندیان اعدام کړي دي."
د هغې په وينا، طالبان بايد د دا ډول ټولو ډله ييزو مجازاتو او نورو جنګي جنايتونو مخه ونيسي او له خپلو ځواکونو سره حساب کتاب وکړي.
اخوا په غور ولایت کې د طالبانو چارواکو په لعل او سرجنګل ولسوالۍ کې د مولوي مهدي مجاهد د یوه ملاتړي قومندان محمد مرادي د وژلو خبر ورکړی دی.
په غور کې د طالبانو د لوا ویاند زبیر مبارز پرون ازادي راډیو ته وویل: "د غور په لعل او سرجنګل ولسوالۍ کې د اسلامي امارت د ځواکونو او بغاوتګرو ترمنځ په نښته کې اتو کسانو ته مرګژوبله اوښتې. په دې ډله کې قومندان محمد مرادي او څلور کسان یې وژل شوي دي."
مبارز زياته کړه چې په دې نښته کې يو طالب وژل شوى او درې نور ټپيان شوي دي.
د سرپل په بلخاب کې له څو ورځو راهیسې د طالبانو د یوه هزاره توکمي ناراضه قوماندان او د حکومتي عسکرو تر منځ جګړه روانه ده.
مهدي مجاهد چې پخوا په بامیانو کې د طالبانو د استخباراتو مسوول پاتې شوی اوس یې د طالبانو په ضد وسله اخیستې او د سرپل په بلخاب کې چې د ده اصلي هستوګنځای بلل کېږي جنګ کوي.
په همدې حال کې طالبانو د شنبې په ورځ په بلخاب کې د پراخو عملیاتو اعلان وکړ.
خو ځايي خلک د بلخاب وضعيت د اندېښنې وړ بولي.
یوه کس چې د موضوع د حساسیت له امله نه غوښتل نوم یې واخیستل شي پرون ماښام ازادي راډیو ته وویل: "حالات ډېر خراب دي، د قومندان مهدي مجاهد درک معلوم نه دی او د بلخاب اکثرو خلکو خپل کورونه او منطقې پرېښې او د غرونو په لمنو کې ژوند کوي."
په همدې حال کې د افغانستان د شیعه علماو د سرتاسري شورا یوه کمېسیون د بلخاب په قضیه کې د جګړې پر ښکېلو غاړو غږ وکړ چې ملکي وګړو ته زیان ونه رسوي او د دې ولسوالۍ د خلکو ژوند او مال ته پام وکړي.
