د سرپل ولایت له بلخاب ولسوالۍ څخه د طالبانو او د هزاره طالب قوماندان مولوي مهدي مجاهد د وسله والو ترمنځ د نښتو راپورونه رارسېږي.
د طالبانو په لیکو کې د خپلمنځي اختلافونو آوازې نور نو له پردې وتلې دي.
د سرپل ولایت په بلخاب ولسوالۍ کې د طالبانو یوازیني هزاره قوماندان مولوي مهدي مجاهد ته یوې نږدې سرچینې چې د موضوع د امنیتي حساسیت له وجې نه غواړي نوم یې په راپور کې راشي آزادۍ راډیو ته وویل، چې د پرون ماښام په جګړه کې د طالبانو ځواکونه له سیمې په شا تګ ته اړ شول خو د سرچینې د ادعا له مخې د قوماندان مجاهد وسله والو ته هم تلفات اوښتي.
هغه وايي: "د طالبانو تهاجمي بریدونه شنډې شول. موټر او تجهیزات یې له منځه ولاړل، څو کسان یې مړه او ټپیان شول او په شاتګ یې وکړ. خو یو تن انتحاري ځان د مجاهدینو په منځ کې والوزاوه چې په نتیجه کې یې د ولسي دفاع ۳ غړي مړه او څلور تنه نور ټپیان شول."
د طالبانو د حکومت د کورنیو چارو وزارت په بلخاب ولسوالۍ کې د جګړې او نښتو راپورونه ردوي.
د دې وزارت ویاند عبدالنافع ټکور په دې اړه چې ولې دې سیمې ته د طالبانو ځواکونه استول شوي آزادۍ راډیو ته وویل، چې حکومت د امنیت د ټینګښت لپاره هرځای ته ځواکونه استولی شي.
ټکور وویل، چې هلته هېڅ ستونزه نه شته او دا هرڅه یوازې تبلیغات دي.
مهدي مجاهد ۱۳ کاله مخکې هغه مهال، چې بهرني ځواکونه په افغانستان کې وو، د طالبانو پر لیکو ورګډ شو او د هېواد په شمال کې یې د جمهوري نظام په سقوط کې هم مهم رول ولوباوه خو وروسته له دې چې طالبان څه کم کال مخکې واک ته ورسېدل د طالبانو له اصلي ډلې سره یې مخالفت پیدا شو.
ویل کېږي، چې مهدي مجاهد له طالبانو څخه د حکومت په اډانه کې د هزارګانو لپاره د پراخې ونډې غوښتنه کوله خو طالب مشرانو د یوه ټولشموله حکومت د جوړولو لپاره نه یوازې د هغه بلکې د نړیوالې ټولنې او د کورنیو سیاسي ډلو غوښتنې هم له پامه غورځولې دي.
له بلې خوا سیمه ایزو سرچینو آزادۍ راډیو ته ویلي دي، چې د بلخاب ولسوالۍ یو شمېر اوسېدونکو د جګړو د پراخېدو له وېرې خپلې مېنې پرېښې دي او نورو سیمو ته کډه شوي دي.
