د نړۍ مشهور میلیارډر او د مایکروسافټ شرکت موسس بېل ګېټس پرون پنجشنبه(د سلواغې۲۸مه) پاکستاني چارواکو ته ډاډ ورکړ چې د ماشومانو د ګوزڼ یا پولیو پرضد مبارزه به جاري ساتي.
د ماشومانو ګوزڼ په نړۍ کې یوازینۍ ناروغي ده چې یوازې افغانستان او پاکستان کې ختمه شوې نه ده.
بېل ګېټس سلګونه میلیونه ډالره په نړۍ کې د پولیو په شمول له ساري ناروغیو سره مبارزې ته ځانګړي کړي دي.
بېل ګېټس چې پاکستان ته په یو ورځني سفر تللی و، پرون د پاکستان ولسمشر د دغه هېواد دوهم لوړ دولتي مډال ورکړ.
د پاکستان ولسمشر عارف علوي او صدراعظم عمران خان د ګېټس خدمتونه وستایل، ویې ویل چې د بېل ګېټس له مرستې پرته د پاکستان لپاره ګرانه وه چې د پولیو پرضد په مبارزه کې لاس ته راوړنې ولري.
ګېټس د اسلام اباد د سفر په لړ کې د پولیو د مخنیوي دولتي مرکز او د کرونا د څارنې مرکزونه ولیدل.
ګېټس ته وویل شول چې د ده د مرستو له کبله په پاکستان کې د پولیو پېښې خورا کمې شوي دي او سږکال تر اوسه یوازې یوه پېښه ثبت شوې ده.
ګېټس نه یوازې د ساري ناروغیو د مخنیوي لپاره له پاکستان سره مرسته کړې بلکې د بې وزلۍ د کمولو لپاره یې په یو شمېر پروژو کې هم مرسته کړې ده.
په ۲۰۱۹م زیږدیز کال یې په امریکا کې د پاکستان له صدراعظم عمران خان سره په کتنه کې پاکستان ته د بې وزلۍ د کمولو لپاره د پروژو د اجرا لپاره د ۲۰۰ میلیونه ډالرو ژمنه ورکړه.
