غربي رسنیو راپور ورکړی چې د امریکا متحده ایالاتو ولسمشر جو بایډن به له افغانستانه ټول امریکايي ځواکونه د روان میلادي کال د سپټمبر میاشتې پر ۱۱مه وباسي.
واشنګټن پوسټ ورځپاڼې او روېټرز خبري اژانس راپور ورکړی چې ولسمشر بایډن ښايي د امریکا د تر ټولو اوږدې جګړې د ختمولو اعلان د چهارشنبې په ورځ (د اپرېل ۱۴مه) وکړي.
ټول امریکايي ځواکونه به پر امریکا د ۲۰۰۱م کال د سپټمبر پر ۱۱مه د ترورېستي حملو د ۲۰م کال له پوره کېدو سره هممهاله له افغانستانه وځي.
تر هغو حملو وروسته، د امریکا متحده ایالاتو په مشرۍ نړیوال ائتلاف د ترورېزم په وړاندې د مبارزې لپاره افغانستان ته دننه شو.
د هغې موافقې له مخې چې د ۲۰۲۰م کال د فبرورۍ میاشتې پر ۲۹مه د طالبانو او د پخواني ولسمشر ډونالد ټرمپ ادارې ترمنځ لاسلیک شوې وه، له افغانستانه د ټولو امریکايي ځواکونو وتلو ته د مې میاشتې لومړۍ نېټې مهلت ټاکل شوی و، خو په دې شرط چې طالبان د ترورېزم په وړاندې د مبارزې لپاره پر خپله ژمنه عمل وکړي.
د سپینې ماڼۍ ویاندې جین ساکي په دې وروستیو کې ویلي چې ولسمشر جو بایډن به له افغانستانه د ټولو امریکايي ځواکونو د وتلو په اړه خپله پرېکړه د مې میاشتې د لومړۍ نېټې تر مهلت مخکې اعلان کړي.
افغان حکومت وايي، له افغانستانه د امریکايي پوځیانو د وتلو د جزئیاتو په اړه نهغواړي نظر ورکړي.
د افغانستان جمهوري ریاست د ستراتېژیکو او عامه اړیکو رئیس وحید عمر پر خپل ټویټر لیکلي، د امریکايي ځواکونو د وتلو پر موضوع له دې وړاندې په ځلونو د امریکا او افغان حکومت ترمنځ خبرې شوې دي.
ښاغلي عمر زیاته کړې چې ولسمشر جو بایډن به په نږدې راتلونکي کې له جمهور رئیس غني سره په خبرو کې رسماً د خپلو ځواکونو د وتلو د پلان جزئیات شریک کړي.
