د افغانستان د ملي دفاع وزارت سرپرست وایي، د هېواد په لویدیځ کې به تر هغو د طالبانو پر وړاندې عملیات روان وي چې دغه ډله خپل پوځي فعالیتونه ونه دروي.
اسدالله خالد دغه خبرې نن هرات ولایت ته د خپل سفر پر مهال کړي دي، دغه سفر کې چې د امنیتي حالت د ارزونې په هدف شوی.
خالد سره په دې سفر کې په افغانستان کې د امریکایي ځواکونو عمومي قومندان جنرال سکاټ مېلر هم ملګرتیا کوله.
په هرات ولایت کې د افغان ځواکونو عملیات وروسته تر هغې پيل شول چې ولسمشر محمد اشرف غني خپل ځواکونه له دفاعي حالته یرغلیز هغه ته بدل کړل.
طالبانو هم هغه مهال وویل چې د افغان ځواکونو هر برید ته به ځواب ورکړي.
طالبانو دغه راز وویل، محمد اشرف غني تر خپل کنټرول لاندې سیمې کې جګړه پراخه کړې ده.
