ملي دفاع وزارت وايي، د افغان ځواکونو په یرغلیزو عملیاتو کې د حکومت د مخالفو وسلهوالو یو شمېر مهم ځایونه په نښه شوي.
د دې وزارت مسوولان وايي، افغان ځواکونو د ځمکني او هوايي بریدونو له لارې وسلهوالو مخالفینو ته درنه مرګ ژوبله اړولې ده.
په کابل او ننګرهار کې د خونړیو بریدونه او په سبا یې د افغان ځواکونو لخوا د یرغلیزو عملیاتو له پیل وروسته، ملي دفاع وزارت په دې بریدونو کې د حکومت مخالفو وسلهوالو ته د درنې مرګ ژوبلې اوښتو خبر ورکوي.
ولسمشر محمد اشرف غني تېره اوونۍ افغان ځواکونو ته پر خپلو دښمنانو د یرغلیزو عملیاتو د پیل امر ورکړ.
د ملي دفاع وزارت ویاند روح الله احمدزي د یکشنبې په ورځ ازادي راډیو ته وویل، په دې عملیاتو کې د حکومت د مخالفو وسلهوالو مهم پټنځایونه په نښه شوي او لهمنځه تللي دي.
هغه زیاته کړه: "په تېرو څو ورځو کې موږ توانېدلي یوو چې د دښمن مواضع او سنګرونه په بېلابېلو ولایتونو او سیمو کې د هوايي او ځمکنیو عملیاتو له لارو تر هدف لاندې ونیسوو او زیات تلفات ور اړول شوي دي، زموږ عملیات به د هوا او ځمکې له لارې همداسې دوام وکړي. "
بدخشان، پکتیا، پکتیکا، ارزګان، خوست، بادغېس، هرات، کندهار، فاریاب او هلمند هغه ولایتونه دي چې د افغان ځواکونو لهخوا په کې د روانې اوونۍ په اوږدو کې هوايي او ځمکني عملیات شوي دي.
د دې وزارت لخوا همدا ډول په ورځني ډول رسنیو سره وسلهوالو ته د اوښتې مرګ ژوبلې خبر ورکول کېږي چې پر بنسټ یې یوازې د یکشنبې په شپه په خوست، فراه او ارزګان کې ۱۹ وسلهوال وژل شوي دي.
خو یو شمېر نظامي شنونکي بیا د یرغلیزو عملیاتو پیل د جګړې د شدت او د تلفاتو د زیاتېدو په معنا بولي.
پخوانی نظامي عبدالباري عارض ازادي راډیو ته وویل، پر افغان ځواکونو به هم د وسلهوالو بریدونه شدت پیدا کړي.
هغه زیاتوي: "زه فکر کوم کوم عملیات چې افغان ځواکونو پیل کړي یا یې شدت ورکړی، پایله به و نه لري، تجربو ښودلې چې په افغانستان کې جګړې په هېڅ سطحه مثبته نتیجه نه درلوده، یعنې ګټونکی نه لري، له همدې کبله باید هڅه وشي چې په دوحه کې د سولې شوې هوکړه عملي شي او زیاته انرژې د سولې د راتلو په هدف مصرف شي."
طالبانو د افغان حکومت لهخوا د دوی پر ضد د یرغلیزو عملیاتو له پیل وروسته په یوه اعلامیه کې دا دریځ د سولې خلاف عمل وباله او تر خوا یې د جګړې د دوام لپاره تیاری وښود.
که څه هم د افغانستان د حکومت لهخوا د یرغلیزو عملیاتو له پیل وروسته، یو شمېر غبرګونونه هم راپورته شول خو د افغانستان حکومت یې په ځواب کې وویل، د یرغلیزو عملیاتو له پیل هدف، د وسلهوالو مخالفینو سولې ته حاضرول دي.
