د ولسمشریزو ټاکنو کاندید ګلبدین حکمتیار وایي چې د افغانستان د ملي یووالي حکومت له طالبانو سره د سولې په لاره کې خنډ دی. د ښاغلي حکمتیار په خبره "ددغه حکومت مشرانو د خپل قدرت دوام په دغه هېواد کې د جګړې له دوام سره غوټه کړی دی."
د سولې او اسلامي عدالت ټاکنیز ټیم مشر ګلبدین حکمتیار داسې مهال دا څرګندونې کوي چې نن د افغانستان حکومت د سولې خبرو په تړاو د خپلو ټولو فعالیتونو درولو اعلان وکړ.
ښاغلي حکمتیار د شنبې په ورځ (وږي ۲۳مه) په کابل کې یوې غونډې ته په وینا کې وویل، دوی به پرېنږدي چې دده په خبره "یوه وړه ډله د افغانستان پر برخلیک حاکم وي، نهایي پرېکړه وکړي او سوله سبوتاژ کړي."
ښاغلي حکمتیار زیاته کړه: "د ملي یووالي حکومت د سولې خنډ دی او د جګړې د دوام غوښتونکی دی. د سولې د هر غږ پر وړاندې خنډ رامنځته کوي. له سولې ډاریږي او خپلې ګټې د جګړې په دوام کې ویني. د قدرت دوام یې د جګړې له دوام سره غوټه کړی. کله چې د دوحې مذاکرات یو حد ته ورسېدل او داسې و چې سبا ته توافق لاسلیک شي، نو دوی تبې نېولي وو او سخت اندېښمن وو."
هغه خبرداری ورکړ، که د ملي یووالي حکومت چمتو نشي چې یو پیاوړی پلاوی جوړ کړي چې د سولې په اړه د وروستۍ پرېکړې صلاحیت ولري او د افغانستان د ټولو اغېز لرونکو ګوندونو استازي پکې وي، نو "موږ به له دولت څخه په خپلواک ډول له نورو اغېز لرونکو ګوندونو سره په تفاهم، د سولې لپاره بله لاره غوره کړو."
ښاغلي حکمتیار په خپلو خبرو کې د ملي یووالي حکومت پر مشرتابه تور پورې کړ چې "په انتخاباتي کمپاینونو کې له دولتي امکاناتو کار اخلي او د دولتي کڅوړو په نوم انتخاباتي رشوت ویشي."
د سولې او اسلامي عدالت ټیم مشر زیاته کړه چې د ولسشمریزو ټاکنو په روان بهیر کې ټولو کاندیدانو ته برابر امکانات نه دي ورکړل شوي.
خو د افغانستان حکومت د سولې په تړاو د ښاغلي حکمتیار څرګندونې ردوي.
د ولسمشرۍ ماڼۍ ویاند صدیق صدیقي ازادي راډیو ته وویل، چې د حزب اسلامي مشر پخپله د حکومت د سولې د هڅو په پایله کې نن په کابل کې دی.
"مونږ د سولې خنډ نه یو. که چېري مونږ د سولې خنډ وای، نو ښاغلی حکمتیار به اوس د سولې پروسې کې شامل نه وو. دی پخپله د سولې یوې پروسې له لارې راغی، ځان یې کاندید کړی او نن په انتخاباتي مبارزو بوخت دی. دا انتقادونه یې بېځایه دي."
د ښاغلي حکمتیار له څرګندونو سره هم مهاله نن د افغانستان حکومت اعلان وکړ چې د سولې خبرو په تړاو یې خپل ټول فعالیتونه درولي دي.
ښاغلي صدیقي نن په یوه خبري کنفرانس کې وویل، له طالبانو سره د سولې په اړه خبرې به تر ټاکنو وروسته نوی جوړېدونکی حکومت کوي. په پام کې ده د افغانستان ولسمشریزې ټاکنې د میزان په ۶مه ترسره شي.
کابل داسې مهال د سولې په اړه نوی دریځ اعلانوي چې د امریکا ولسمشر ډونالډ ټرمپ تېره اونۍ (وږي ۱۶مه) د طالبانو او امریکا ترمنځ د افغانستان د سولې په تړاو مذاکرات لغوه کړل.
د مذاکراتو لغوه کېدو وروسته طالب استازي له دوحې څخه مسکو ته په سفر تللي. د طالبانو د سیاسي دفتر یوه غړي شېرمحمد عباس ستانکزي روسي رسنیو ته په مرکه کې ویلي چې لا هم لېواله دي د خبرو له لارې افغانستان ته سوله راشي او چمتو دي امریکا سره خبرې له سره پیل کړي.
