د راتلونکو ولسمشریزو ټاکنو لپاره ۱۲ زره ښځې له خپلو محرمو سره د تلاشۍ لپاره ګمارل کېږي.
د افغانستان د ټاکنو خپلواک کمېسیون وايي، دغه ښځې به په موقت ډول د ټول هېواد په کچه ګمارل کېږي، خو ۱۲ زره محرمان بهیې بیا د دغو ښځو د خوندیتوب لپاره ورسره بوخت وي.
د دغه کمېسیون ویاند ذبیح سادات د دوشنبې په ورځ «۱۳۹۸ کال د وږې ۰۴» ازادي راډيو ته وویل چې د ښځو دا شمېر د ښځو چارو وزارت له لوري ورپېژندل شوی دی.
ښاغلی سادات زیاتوي: "۱۲ زره ښځې او ۱۲ محرمانیې چې ټولټال ۲۴ زره کسان کېږي، دا د ښځو چارو وزارت له لوري معرفي شوي چې د ټاکنو په ورځ به د تلاشي کوونکو په توګه د ټاکنو له کمېسیون سره همکاري وکړي."
دغه کمېسیون وایي، هره هغه مېرمن چې د ټاکنو په پروسه کې د تلاشي کوونکې په توګه همکاري کوي امتیازات هم ورته په پام کې نیول شوي دي، خو دغه امتیازات د دوی د محرمانو لپاره نهدي.
له دې سره په دغه پروسه کې د رأی ورکولو د مرکزونو بندوالی او له لوړ امنیتي ګواښ سره مخ کېدل هغه څه دي چې د ټاکنو خپلواک کمېسیونیې اندېښمن کړی دی.
د دغه کمېسیون په خبره، دا مهال د امنیتي بنسټونو له لوري ورته یوازې د ۴۹۰۰ مرکزونو د امنیت د ټینګښت ډاډ ورکړل شوی دی.
تر دې وړاندې دغه کمېسیون امنیتي بنسټونو ته د ۷۳۷۳ مرکزونو وړاندیز کړی وو، خو د امنیتي بنسټونو له لوري ورته د ۵۳۷۳ مرکزونو د امنیت ډاډ ورکړل شو چې دا شمېر هم بالاخره ۴۹۰۰ ته راښکته شو.
د کورنیو چارو وزارت بیا وایي چې د ښځینه پولیسو د کموالي له امله اړ دي چې له ملکي ښځو په دې پروسه کې همکاري وغواړي.
دغه وزارت وایي، انتخاباتو ته په نږدې ورځو کې به د تلاشۍ او پلټنو لپاره ښځو ته روزنې ورکړل شي.
د دغه وزارت ویاند نصرت رحیمي د دوشنبې په ورځ ازادي راډیو ته وویل: "تاسو پوهېږئ چې په ټول هېواد کې موږ درې نیم زره ښځینه پولیسې لرو، خو دا کفایت نهکوي، ځکه د دوی ترڅنک به د ولسي جرګې په انتخاباتو کې چې کومو ښځو د تلاشۍ په برخه تجربه درلوده، له هغوی به دا ځل هم ګټه اخیستل کېږي او دا کار د ښځو چارو وزارت په همغږۍ شوی دی."
پر انتخاباتو د څار یو شمېر بنسټونه بیا د حکومت له دغه پرېکړې هرکلی کوي، خو وایي چې د تلاشۍ لپاره د ښځو له محرمانو دې هم د انتخاباتو په پروسه کې کار واخیستل شي، ترڅو دا پروسه خوندي او پیاوړې شي.
دا په داسې حال کې ده چې د ولسي جرګې د انتخاباتو پر مهال د رأی ورکولو په مرکزونو کې د ښځو لپاره د تلاشۍ او اسانتیاوو له نشتوالي خلکو شکایتونه کړي وو.
