د افغانستان دیني عالمانو د سعودي عربستان په ناسته کې د نړۍ دیني عالمانو ته د افغان حکومت او طالبانو ترمنځ د خبرو لپاره د منځګړیتوب بلنه ورکړه.
د افغان سولې او جګړې په اړه د سعودي عربستان په ناسته کې افغان دیني عالمانو د دغه کنفراس له ګډون کوونکو علماوو څخه وغوښتل چې خپل له منځه یو پلاوی وټاکي څو له طالبانو سره مخامخ خبرې وکړي.
د افغانستان د علماوو سرتاسري شورا مشر قیامالدین کشاف په یاده ناسته کې د وینا پر مهال د سعودي پاچا او حکومت ته په خطاب کې ویلي چې د سولې د مذاکراتو لپاره دې طالبان حرمینو ته دعوت کړي.
ښاغلي کشاف د یادې غونډې په څنډه کې خبریالانو ته وویل چې د دغې ناستې پایلو ته ډېره هیلهمندي شته.
نوموړي زیاته کړه:
"د ټولو علماوو نظریات ډېر ښه وو، مثبت وو او ټولو حق ته حق ووایه او هغه څه چې په افغانستان کې روان دي هغه نهتوجیه کېږي. د اسلام له نظره زموږ همدغه توقع وه چې دا یې وویلې او انشاءالله چې نتیجه بهیې ډېره مثبته وي."
د ښاغلي کشاف په خبره علماء مکلفیت لري چې د تشدد، عام وژنې، افراطیت، انفجار او انتحار په اړه واضح دریځ څرګند کړي.
د افغانستان د علماوو د سرتاسري شورا مشر همداراز ویلي چې حکومت افغان دیني عالمانو ته د سولې په خبرو کې د منځګړیتوب صلاحیت ورکړی او دوی هم په ټول امانت دغه صلاحیت د نړۍ دیني عالمانو ته ورکوي.
په سعودي عربستان کې د څه باندې ۳۷ هېوادونو د دیني عالمانو ناسته به دوه ورځې دوام وکړي.
د دغه ناستې لپاره وار له مخه په افغانستان کې د حکومت سربېره سیاسي جریانونو خوشبینې ښودلې ده.
خو طالبانو بیا د یوې اعلامیې په خپرولو سره په سعودي عربستان کې د دیني عالمانو ناسته غندلې ده.
له دې ټولو سره سره د کعبې امام صالح بن حمید په خپلو خبرو کې ویلي چې په افغانستان کې روان وضعیت نور د زغم نهدی.
د ښاغلي حمید په خبره اسلام د سولې دین دی او پهکار ده چې اختلافات د جګړې له لارې نه، بلکې د خبرو اترو له لارې حل شي.
نوموړي زیاته کړه:
"اسلام د سولې او سلام دین دی، موږ یو بل سره په السلام علیکم باندې روغبړ کوو، امن او ایمان د یو بل قرین او جانشین دي، په قران شریف کې دا پوښتنه شوې چې کومه ډله د خدای له عذابه په دنیا او اخرت کې د امن ډېره مستحقه ده؟ ځوابیې هم راغلی دی چې هغه ډله چې ایمانیې راوړی او د ایمان تر څنګیې ظلم نهدی کړی، د دوی لپاره امن دی او همدوی ته هدایت او لارښوونه شوې ده."
په ورته وخت کې د افغانستان د مشرانو جرګې لومړی مرستیال محمد علم ایزدیار بیا وايي چې د سعودي ناسته د دواړو افغان حکومت او طالبانو لپاره طلايي فرصت دی.
ښاغلي ایزدیار د سې شنبې په ورځ د مشرانو جرګې عمومي غونډې ته وویل چې طالبان باید د سولې د ټینګښت لپاره رامنځته شوی فرصت له لاسه ورنهکړي او د بهرنیانو د وتلو په ګډون ټول د اختلاف وړ مسایل د جګړې نه، بلکې د خبرو لارې حل کړي.
راپور: محمد حدیث پردېس
