په افغانستان کې د ازادو رسنیو ملاتړ کوونکې اداره "نی" وايي، په هرات کې د رسنیو وضعیت بحراني دی.
د دغې ادارې په نوې څېړنه کې راغلي چې امنیتي ستونزې، اطلاعاتو ته نهلاسرسی او له رسنیو سره د حکومت تقابل له مهمو ننګونو څخه دي.
د دغې ادارې اجرائیوي رئیس مجیب خلوتګر د سې شنبې په ورځ «۱۳۹۷ کال د وري ۲۸» په کابل کې خبریالانو ته وویل، په هرات کې د رسنیو وضعیت بحراني دی او حکومت باید د ستونزو د څېړلو لپاره یو پلاوی دغه ولایت ته واستوي.
دی وايي:
"حکومت له رسنیو سره په تقابل کې دی او د خبریالانو د مصونیت په تړاو هېڅ ډول اقدام نهدی ترسره شوی، همدارنګه د دولتي ادارو ویاندویان په خبري کنفرانسونو کې د خبریالانو پوښتنو ته ځواب نهورکوي، زموږ د څېړنو پر اساس د هرات د رسنیو وضعیت د اندېښنې وړ دی او باید یو پلاوی دغه ولایت ته واستول شي، ترڅو جدي څېړنه وکړي."
دغه اداره وايي، پهدې وروستیو کې د هرات په یوې سیمهییزې رسنۍ باندې حمله او د یوه سیمهییز ټلوېزیون د خبریال وهل ټکول او بیا بندي کول او لسګونه نورې قضیې د خبریالانو په وړاندې له مهمو ستونزو شمېرل کېږي.
په افغانستان کې د خبریالانو د وضعیت د لا خرابېدو په اړه پهداسې حال کې ویل کېږي چې د "نی" په خبره، دوی په تېرو څو اوونیو کې د خبریالانو په وړاندې د ګواښنې څو قضیې چې د اسوشیټېډ پرس خبري اژانس د عکاس مسعود حسیني، د اریانا ټلوېزیون د عکاس او دغهشان د شېبه راډیو د خبر د څانګې د مدیر د وهلو ټکولو قضیې پهکې شاملې وې، ثبت کړې دي.
خو د هرات چارواکي پهدغه ولایت کې د رسنیو د ناوړه وضعیت په تړاو راپورونه ردوي او وايي، دوی تل هڅه کړې خبریالانو ته په خپل وخت معلومات ورکړي.
د هرات د والي ویاند جیلاني فرهاد ازادي راډیو ته وویل:
"په اوونۍ کې درې ورځې د هرات د ټولو دولتي ادارو رئیسان خبریالانو ته د خپلو فعالیتونو په تړاو معلومات ورکوي او د خبریالانو پوښتنې ځوابوي، همدارنګه د هرات د ولایت مقام لارښوونه او ټينګار دا دی، څو له خبریالانو ملاتړ وشي او ورته اسانتیاوې برابرې شي."
بلخوا یو شمېر افغان خبریالان وايي، که د حکومت لهخوا د خبریالانو وضعیت ته جدي پاملرنه ونهشي، د دوی پر وړاندې به تاوتریخوالی او ستونزې نورې هم زیاتې شي او دې سره به په افغانستان کې د بیان ازادي له پوښتنې سره مخ شي.
راپور: ناجیه ساپۍ
