د ولسمشر لخوا د بلخ د پخواني والي عطا محمد نور د استعفا د منظورۍ پر سر د راپورته شویو جنجالونو په دوام، پخوانی جهادي رهبر او سیاسي مشر عبدالرب رسول سیاف وايي، اوسمهال د دې جنجالونو او کشکمشونو وخت نه دی.
ښاغلي سیاف چې د جمعې په ورځ يې«۱۳۹۶کال مرغومې ۰۸» په پغمان کې يوه علمي سیمینار ته وینا کوله وویل چې د هېواد روان وضعیت ته په کتو د دې اړتیا لېدل کېږي چې ټول سره یو مټي شو او د روغې جوړې لار غوره شي.
نوموړي زیاته کړه:
"د هېواد سلامت، عزت او حثیت په دې کې دی چې له وړو وړو خبرو تېر شو، د يو بل سره روغه جوړه وکړو، يو بل ته د دوستۍ او ورورولۍ لاس ورکړو او هېواد له روان ناورین څخه وباسو، اوس وخت د کشمکشونو او جنجالونو نه دی، اوس وخت د دې دی چې يو بل ته سره لاسونه ورکړو او هېواد له دغه حالته وباسو او د خدای په مرسته د غم ټغر له هېواده ټول کړو."
ښاغلی سیاف دا څرګندونې په داسې حال کې کوي چې د ولسمشرۍ ماڼۍ لخوا د عطا محمد نور د استفعا تر منظورېدو وروسته جمعیت اسلامي ګوند ویلي و چې د ارګ دغه پرېکړه يو اړخیز او دوی ته د منلو نه ده.
دغه ګوند ویلي، د بلخ له ولایته د عطا محمد نور ليرې کېدل به هله ومني چې ولسمشرۍ ماڼۍ د دوی شرائطو ته غاړه کېږدي.
فرهاد عظیمي د عطا محمد نور د ځای ناستي په توګه ټاکل، دغه ګوند ته د څو وزارتونو، ولایتونو او سفارتونو سپارل هغه شرطونه دي چې له دې وړاندې د جمیعت اسلامي ګوند لخوا مطرح شوي دي.
د ښاغلي نور د استفعا تر منل کېدو وروسته، نوموړي پر اجرائیه رئیس سخت انتقاد وکړ او وې ویل چې عبدالله عبدالله د ده د استفعا په منظورۍ کې ۸۰ سلنه لاس درلود.
خو ښاغلي عبدالله ویلي چې د بلخ د والي د استعفا منظوري یو اړخیزه نه، بلکې د ده استعفا د جمعیت د ګوند د ځینو مهمو مشرانو په تفاهم سره حکومت منظوره کړې ده.
په ورته وخت کې د جمعیت اسلامي ګوند وايي، ټاکل شوې چې د حکومت او جمعیت اسلامي ترمنځ د رامنځته شویو اختلافاتو د هواري په هدف خبرې اترې پیل شي.
د دغه ګوند مرستیال ویاند ذبیح فطرت د جمعې په ورځ ازادي راډیو ته وویل:
"زموږ باور په خبرو اترو او تفاهم دی، موږ د خبرو اترو پرته تر دې مهال کومه بله لار نه ده مطرح کړې، زموږ اعتراض پوست او مدني اعتراض دی."
ښاغلی فطرت که څه هم د دغو خبرو د پېلېدو د دقیقې نېټې په اړه څه نه وايي، خو تمه يې دا ده چې راتلونکې اوونۍ به دغه خبرې پېل شي.
ولسمشرۍ ماڼۍ د دغو احتمالي خبرو په اړه لا تراوسه څه نه دي ويلي.
راپور: واصل وصال
