سپینې ماڼۍ فلسطیني چارواکي تورن کړي چې د سیمې د راتلونکې په اړه خبرې نهکوي.
امریکا خواشیني ښودلې چې فلسطیني چارواکي له مرستیال ولسمشر مایک پنس سره د سیمې د راتلونکې په اړه خبرو ته حاضر نهشول.
دا خبره پرون د امریکا د مرستیال ولسمشر مایک پنس د دفتر یوه مسؤل جراډ اګېن په یوه بیان کې کړې ده.
تمه ده مایک پنس د ډسمبر تر ۲۵مې دمخه چې د کرسمس له رخصتیو سره سمون خوري منځني ختیځ ته سفر وکړي.
فلسطیني چارواکي د سیمې د راتلونکې په اړه خبرې نهکوي.
د فلسطیني ادارې مشر محمود عباس یاور مجديالخالد وړمه ورځ ویلي چې "هېڅ کومه لیدنه به ونهشي."
ځکه د ده په خبره: "امریکا د بیتالمقدس په اړه په پرېکړې سره ټولې سرې کرښې ماتې کړې."
د امریکا متحده ایالاتو ولسمشر ډونالد ټرمپ د چهارشنبې په ورځ اعلان وکړ چې بیتالمقدس د اسرائیل پلازمېنه ګڼي او خپل سفارت به ورانتقال کړي.
د ټرمپ دې خبرې د امریکا د ځینو ملګرو په شمول د نړیوالې ټولنې او اسلامي هېوادونو تُند غبرګونونه وپارول.
د عربلیګ هېوادونو د بهرنیو چارو وزیرانو په یوه بېړنۍ غونډه کې د ټرمپ پرېکړه وغندله او ویېویل چې نور نو واشنګټن د اسرائیل او فلسطین د سولې یو بېپرې منځګړی نهشي ګڼل کېدای.
د ترکیې ولسمشر رجب طیب اردوغان هم د امریکا دا پرېکړه غندلې او اسرائیلیې یو "ترورېستي" دولت بللی دی.
خو اخوا د اسرائیل صدراعظم بنیامین نتانیاهو وايي، بیتالمقدس له ۳۰۰۰ کالو را په دېخوا د اسرائیل پلازمېنه ده او د ده په خبره هر څومره ژر چې فلسطینیان دا حقیقت ومني، د سولې خبرې هغومره ژر پیلېدای شي.
بنیامین نتانیاهو پرون دا خبرې په پاریس کې د فرانسې له ولسمشر امانوئل مکرون سره چې د امریکا د پرېکړې په اړهیې تُند دریځ غوره کړی بیان کړې.
اخوا بنیامین نتانیاهو نن د اروپايي ټولنې د بهرني سیاست له مشرې فدریکا موګرېني سره په بروکسل کې وکتل.
اغلې موګرېني وویل، د بیتالمقدس په اړه د برخلیک تر معلومېدو پورې په یوې واحدې نړیوالې اجماع درېږي.
دی وايي:
"موږ به د بیتالمقدس په اړه نړیوالې اجماع ته درناوی جاري وساتو تر څو چې د مقدس ښار د برخلیک په اړه ښکېلې خواوې د مستقیمو خبرو په مټ یوې پرېکړې ته ورسېږي. موږ هیله لرو چې ښکېلې خواوې د نړیوالې ټولنې په ملاتړ له یو بل سره خبرو ته کېني."
د ملګرو ملتونو سازمان د بیتالمقدس په سر د راپورته شویو لانجو په اړه ویلي چې د اسرائیل او فلسطین ترمنځ د دوه دولتونو له مستقیمو خبرو بله هېڅ لار مؤثره نهده او د سولې خبرې زیانمنوي.
خو د ډونالد ټرمپ د چهارشنبې ورځې اعلان په ګڼو اسلامي هېوادونو له هغې ډلې په خپله فلسطین، اردن، ترکیه، پاکستان، افغانستان او مالیزیا کې مظاهرې وپارولې او په غزه کې یې کړکېچ لا پسې زیات کړ.
راپور: صفيالله ستانکزی
