تر دې مخکې د ایران د قضائیه قوې خبري اژانس میزان پرون د سمنان ولایت د لوی څارنوال محمد صادق اکبري په وینا راپور ورکړی و، چې ویلي یې وو د سویس یوه وګړي د دغه ولایت په یوه زندان کې ځان وژلی دی.

د راپور له مخې د سویس دغه وګړی د «جاسوسۍ» په تور نیول شوی و.

د ایران سپاه پاسداران په وروستیو کلونو کې د ایران لسګونه دوه تابعیت لرونکي وګړي تر ډېره د جاسوسۍ په تور، له غربي دولتونو د امتیاز اخیستلو یا هم د خپلو بندیانو د تبادلې لپاره نیولي دي.

د امریکا منتخب ولسمشرډونالډ ټرمپ وایي، په اوکراین کې د جګړې د پای ته رسولو په هدف د روسیې له ولسمشرولادمیرپوتین سره د ده د کتنې لپاره چمتوالی نیول کیږي.

ټرمپ پرون پنجشنبې په فلوریدا کې په خپل هستوګنځای کې له جمهوریپالو والیانو سره د کتنې په مهال د خبریالانو د پوښتنو په ځواب کې وویل چې پوتین غواړي له ده سره وګوري او «موږد دې غونډې پرتنظیمولو کارکوو.»

ټرمپ وویل، جزییات یې تراوسه نه دي بشپړ شوي خو زیاته یې کړه چې پوتین غواړي ور سره وویني او دا خبره یې په عام محضرکې هم کړې او دوی باید دغه جګړه چې نده خونړۍ شخړه یاده کړه، پای ته ورسوي.

ټرمپ د ولسمشرۍ په انتخاباتي کمپاینونو کې ژمنه کړې چې د ولسمشرپه توګه د دندې له پلیدو وروسته په ۲۴ ساعتونو کې به په اوکراین کې جګړه پای ته ورسوي، خونوموړي په دې اړه نورجزیات ندي افشا کړي.

هغه له پوتین سره خپلې اړیکې ستایلي او ادعا کړې چې دغه جګړه درولی شي. ټاکل شوې چې ټرمپ د روانې جنوري میاشتې په شلمه د ولسمشر په توګه لوړه وکړي.

پرون د کراچۍ په ښار کې د پولیو د یوې مثبتې پيښې خبر خپور شو. ډاکټران وایي چې دا ماشوم په اصل کې تیرکال په پولیو اخته شوی و او تازه یې ناروغي تشخیص شوه.

تر دې وروسته د پاکستان د پولیو د مخنیوي پروګرام اعلان وکړ چې سږ دوه زره پنځه ویشتم کال به په ټول پاکستان کې د فبروري له میاشتې تر پنځو کلونو پورې ماشومان بیا واکسین کړي.

په پاکستان کې د پولیو ۲۷ پيښې په بلوچستان کې، ۲۱ په خیبرپښتونخوا کې، ۲۰ په سند کې او یوه یوه پيښه په پنجاب او پلازمینې اسلام اباد کې ثبت شوې دي.

پاکستان او افغانستان د نړۍ یوازیني دوه هیوادونه دي چې لاهم د پولیو مثبتې پیښې پکې لیدل کیږي.

د ناټو دفاع وزیرانو د پنجشنبې په ورځ (د جنوري ۹مه) په جرمني کې د اوکراین د دفاعي اړیکو ډلې په غونډه کې وویل چې د ناټو غړیو د دفاعي دندو د ترسره کولو وړتیا د ناخالص کورني تولید په تناسب د لګښتونو په پرتله ډیره مهمه ده.

د جرمني دفاع وزیر بوریس پیستوریس وویل چې دا مهال ټولې شمیرې او سلنه په هیڅ ډول ګټورې نه دي، ځکه چې د یو پياوړي ناخالص کورني تولید دوه سلنه کیدای شي ډیره وي، او د یو کمزوري ناخالص کورني تولید درې نیم سلنه کیدای شي ډیره لږه وي.

په جرمني کې، چې د اروپا تر ټولو لوی اقتصاد دی پنځه په سلو کې ناخالص کورنی تولید ښایي د دغه هیواد د بودیجې څلویښت سلنه جوړه کړي.

متحده ایالات اوس مهال د خپل ناخالص کورني تولید ۳.۳۸ سلنه په دفاع مصرفوي.

د استونیا دفاع وزیر هانو پوکور ازادي راډیو ته وویل چې متحده ایالات باید د خپلو دفاعي لګښتونو د زیاتوالي لپاره خپل چمتووالی وښيي؛ ځکه چې د هغه په وینا، دا شمېره به د امریکا دفاعي لګښت ۱.۵ ټریلیون ډالرو ته لوړ کړي.

د دفاعي لګښتونو د نوي هدف د تصویب لپاره د ناټو د ټولو ۳۲ غړیو هېوادونو موافقه اړینه ده.

د جنوبي افریقا د کرکټ بورډ مشر ریحان ریچارډز پرون وویل، چې پر افغان لوبډلې د بندیز لګولو پریکړه به هغه وخت اغیزمنه وي چې د کرکټ د نړیوالې شورا ټول غړي یوه پریکړه وکړي.

ښاغلي ریچارډز دا نظر وروسته تر دې ورکړ چې د جنوبي افریقا د سپورټ وزیر ګیتون مکنزي تر دې مخکې وویل، له افغان لوبډلې سره باید د دې لپاره مسابقه ونه شي چې د طالبانو حکومت په افغانستان کې د ښځو لوبې منع کړې دي او د نجونو د کرکټ ملي لوبډله یې منحل کړې ده.

ټاکل شوې ده چې جنوبي افریقا د فبروري میاشتې په ۲۱مه په پاکستان کې له افغان لوبډلې سره لوبه وکړي.

تر دې مخکې د بریتانیا څه باندې ۱۶۰ سیاستوالو د خپل هېواد له کرکټ بورډه غوښتي و چې بریتانیا دې د افغانستان په وړاندې د فبروري پر ۲۶مه پلان شوې سیالي لغوه کړي.

د کرک اینفو په نوم د سپورټ مشهورې ویبپاڼې د کرکټ د نړیوالې شورا ( ای سي سي) د یوه ویاند په وینا چې د هغه نوم یې نه دی اخیستي پرون خبر ورکړ چې د افغانستان کرکټ بورډ د طالبانو د حکومت د تګلارو مسوول نه دی.

د اوکراین لپاره د امریکا د منتخب ولسمشر ډونالډ ټرمپ ځانګړی استازی وايي، د ټرمپ له خوا د اوکراین د جګړې د پای ته رسولو په حل لارو کې به د اوکراین ګټې په پام کې ونیول شي.

د هغه په خبره، دا حل لارې به عادلانه وي.

د اوکراین په چارو کې د ټرمپ استازی چې یو متقاعد جنرال دی او کیت کلوګ نومیږي، د چهارشنبې په ورځ فاکس نیوز تلویزیون ته په مرکه کې وویل، " خلک باید پوه شی، چې هڅه نه کوي د روسیې ولسمشر ولادیمیر پوتین او یا روسانو ته امتیاز ورکړي".

د کلوګ په خبره، هڅه يې دا ده چې اوکراین وژغوري او حاکمیت يې وساتي.

د امریکا منتخب ولسمشر ډونالډ ټرامپ په خپلو ټاکنیزو کمپاینونو کې ویلي و، د واک له ترلاسه کولو وروسته به په ۲۴ساعتونو کې د اوکراین جګړه پای ته ورسوي.

خو دا چې څنګه به دا کار کوي، په دې اړه يې جزییات نه و، ورکړي.

دونالډ‌ ټرمپ تازه ویلي، هیله من دی چې په شپږو میاشتو کې د اوکرایین جګړه پای ته ورسوي.

د امریکا اوسني ولسمشر جو بایډن د لاس انجلس په سیمه کې د ځنګلونو د اورلګیدنې له امله ایټالیا ته خپل پلان شوی سفر لغوه کړ.

د سپینې ماڼۍ ویاندې کارن جین پییر د چهارشنبې په ورځ ناوخته وویل چې بایډن لاس انجلس ته سفر وکړ ترڅو له پولیسو، اور وژونکو او بیړني پرسونل سره وګوري.

د امریکا رسنیو راپور ورکړی چې تر اوسه پورې په دغې اورلګېدنه کې لږ تر لږه پنځه کسان مړه شوي دي.

جین پییر زیاته کړه چې بایډن له لاس انجلس څخه واشنګټن ته د راستنیدو سره سم ایټالیا ته خپل سفر لغوه کړی.

ټاکل شوې وه چې بایډن راتلونکې جمعه په واتیکان کې د کاتولیکو عیسویانو له مشر پاپ فرانسیس او د ایټالیا د حکومت له مشرتابه سره وګوري.

سپينه ماڼۍ وایي، هغه بشري مرستې چې د طالبانو له واکمنۍ وروسته افغانستان ته لېږل کیږي، عام خلک ترې ګټه اخلي، نه طالبان.

دغه خبره د سپینې ماڼۍ د ملي امنیت شورا ویاند جان کربي د چهارشنبې په ورځ ناوخته امریکا غږ ته د منتخب ولسمشر ډونالډ ټرمپ د خبرو په غبرګون کې وکړه.

ټرمپ د سه شنبې په ورځ په فلوریدا کې یوه خبري کانفرانس ته د خبرو پر مهال ادعا وکړه چې د جوبایډن ادارې طالبانو ته میلیاردونه ډالره لیږلي چې په خبره یې د نه منلو وړ کار دی.

جان کربي بیا امریکا غږ ته ویلي " افغانستان ته چې بشري مرستې رسیدلي، د افغانستان خلکو ته رسیږي، نه طالبانو ته. دا همداسې په میخانیکي ډول تنظیم شوې دي."

د طالبانو حکومت هم د ټرمپ دغه څرګندونې رد کړي دي.

د طالبانو د حکومت مرستیال ویاند حمدالله فطرت پرون ادعا وکړه چې امریکا افغانستان ته لېږل شوې ټولې پیسې پر خپلو اهدافو لګولي او د دوی حکومت ته یې نه دي ورکړي.

په افغانستان کې د امریکا پر مرستو د څار ادارې سیګار ویلي، امریکا د طالبانو له واکمنۍ راهیسې تراوسه څه باندې درې میلیارده ډالر افغانستان ته لیږلي دي.

د ایټالیا چارواکي‌ وایي، د دوی د هېواد خبریاله چچیلیا سالا د ایران له زندانه خوشې او روم ته روانه شوې ده.

د ایټالیا د صدراعظمې جورجا ملوني دفتر نن چهارشنبه ( د مرغومي ۱۹مه) په یوه خبرپاڼه کې ویلي چې میرمن سالا د ډيپلوماتیکو او استخباراتي هڅو په پایله کې خوشې شوې.

د ایټالیا صدر اعظمې جورجا ملوني پر خپله ایکس پاڼه/ پخواني ټویټر له هغو ټولو کسانو مننه کړې چې د دغې خبریالې په خوشې کېدو کې یې مرسته کړې.

ایټالیوۍ خبریاله چیچیلیا سالا چې نهه ویشت کاله عمر لري، د لیندۍ یا قوس میاشتې په ۱۹مه ایران کې ونیول شوه.

ایراني چارواکو د دغې خبریالې د نیولو لامل د خپل هېواد د قوانینو نقض بللی دی.

د دغې خبریالې نیولو د ایټالیا سخت غبرګون پارولی و او د دې لامل شو چې ایټالیا په روم کې د ایران سفیر احضار کړي.

اوکراین وایي، د روسیې په جنوبي سیمه سرتوف کې یې د تيلو یوه ډيپو په نښه کړې ده.

برید نن چهارشنبه ( د مرغومي ۱۹مه) په یوه ستراتیژیکه هوایي اډه کې د تيلو پر زیرمې شوی چې د اوکراین د لوی درستیز په خبره " روسي اشغالګرو" ته یې د لوجستیک په برخه کې ستونزې پیښې کړي دي.

خبر کې راغلي چې دغه برید د یوې اوکراینۍ وسلې په مټ شوی دی، نه د هغو وسلو په مټ چې لویدیځو هېوادونو اوکراین ته ورکړي دي.

روسي چارواکو تراوسه په دې اړه څه نه دي ویلي، خو د اوکرایني چاروکو په خبره دغې اډه کې د چاودنو غږ اوریدل شوی او اور بل شوی دی.