د کندز ولایت یو شمېر اوسېدونکي وايي، له څلورو ورځو راهیسې د کندز مرکز اړوند د تلوکې او د چهاردرې ولسوالۍ د عمرخېلو په سیمه کې د افغان ځواکونو او وسلهوالو مخالفینو تر منځ جګړه جریان لري چې له املهیې یو شمېر کورنۍ له خپلو مېنو بېځایه شوي دي.
د یادو سیمو اوسېدونکي وايي چې روانې جګړې اندېښمن کړي او له حکومت څخه غواړي چې روان وضعیت ته جدي پاملرنه وکړي څو خلک په خپلو سیمو کې ارام ژوند وکړي.
د کندز ښار یوه تن اوسېدونکي احمدالله په دې اړه ازادي راډیو ته وویل:
"په دې څو ورځو کې امنیتي ګواښونه یو ځل بیا زیاد شوي دي او هرې خواته ډزې دي، خو سیمهییز چارواکي ټول په خوب بیده دي او د دې ولایت امنیت ته هېڅ توجه نهکوي. همدارنګه د دې ولایت د عمومي لویو لارو په اوږدو کې هم امنیتي ګواښونه موجود دي، موږ له مرکزي حکومت څخه غواړو چې د کندز وضعیت ته توجه وکړي."
په ورته وخت کې د کندز د ولایتي شورا غړې کریمه صادقي بیا وايي، د دې ولایت سیمهییز چارواکي دا وړتیا نهلري چې د دې ولایت د ښار نېږدې څنډې د وسلهوالو مخالفینو له شتون څخه تصفیه کړي.
نوموړې زیاته کړه:
"له څو ورځو راهیسې یو ځل بیا امنیتي وضعیت خراب شوی دی او د دې روانې جګړې له کبله ملکي خلکو ته هم مرګ ژوبله اوښتې ده او د کندز سیمهییز چارواکي دومره وړتیا نهلري چې خپل ټپیان د جنګ له ډګر څخه روغتون ته انتقال کړي چې دغه روان وضعیت خلک سخت اندېښمن کړي دي."
بلخوا د کندز امنیه قوماندان جنرال عبدالحمید حمیدي د دغو انتقادونو په ردولو سره وايي چې دوی د دې ولایت په بېلابېلو سیمو کې د وسلهوالو مخالفینو لوی بریدونه مات کړي دي او دمګړۍ د کندز ټولې لويې لارې د ټرافیکو پر مخ خلاصې دي.
نوموړي زیاته کړه:
"اوسمهال جدي امنیتي ګواښونه نهشته د کندز-علياباد لویه لاره د ترافیکو پر مخ خلاصه ده، د طالبانو یو ګروپ په دې لاره کې پیدا شوی وو چې هغه د امنیتي ځواکونو په غبرګون کې له سیمې وتښتېدی او اوس مهال د دې ولایت ټولې لويې لارې د ترافیکو پر مخ خلاصې دي."
ښاغلی حمیدي زیاتوي چې لاهم د تلوکې سیمه کې همدارنګه د چهاردرې ولسوالۍ د عمرخېلو سیمه کې د افغان ځواکونو تصفیوي عملیات جریان لري.
خو د کندز خلک وايي، تر څو چې د دې ولایت د ګلتپه، اقتاش، چهاردرې او دشت ارچې ولسوالۍ چې د وسلهوالو مخالفینو مهم مرکزونه شمېرل کېږي د هغوی له وجود څخه نهوي پاک شوي، نو د کندز ښار به تل د وسلهوالو مخالفینو تر جدي امنیتي ګواښونو لاندې وي، دوی له مرکزي حکومت څخه غواړي چې لومړی دغه یادې شوې ولسوالۍ د طالبانو له شتون څخه تصفیه کړي او بیا د تصفیوي عملیاتو لمن د دې ولایت نورو سیمو ته وغځوي.
راپور: اجمل ارین
