د کندز سیمهییز چارواکي وايي چې نن د شنبې په ورځ د کندز– تخار لویه لار د ترافیکو په مخ خلاصه شوې او اوس مهال خلک پرې په ډاډه زړه تګ را تګ کولای شي.
د کندز- تخار لویه لار له ۷ ورځو راهیسې د وسلهوالو مخالفینو او افغان ځواکونو ترمنځ د جګړې له کبله د ترافیکو په مخ تړلې وه، خو د جمعې په ورځ افغان ځواکونه و توانېدل چې دغه لار د وسلهوالو مخالفینو له شتون څخه پاکه کړي، خو د شنبې په ورځ پر دغې لويې لارې خلکو ته د تګ را تګ اجازه ورکړل شوه.
د کندز والي اسدالله عمرخېل له رسنیو سره د خبرو پرمهال وویل چې دغه لویه لار د ترافیکو په مخ خلاصه ده او د دغې لارې د خوندېتوب لپاره دوی جدې پلانونه ترلاس لاندې لري.
ښاغلي عمرخېل زیاته کړه:
"لار اوس مهال خلاصه ده او خلک کولای شې تګ را تګ پرې وکړي، هېڅ ډول ستونزه نه لري او په دې ۷ ورځنۍ جګړه کې ۵۵ تنه وسلهوال طالبان وژل شوي او ۴۶ تنه یې ټپيان شوي، همدارنګه ۱۰ تنه دولتي ځواکونه وژل شوي او ۱۳ تنه یې ټپيان شوي دي."
په ورته وخت کې د کندز– تخار او بدخشان ولایتونو خلک هم ډېر خوشحاله دي چې دغه لویه لاره د ترافیکو په مخ خلاص شوه.
د دغې لارې په اوږدو کې یوه تن ځايي اوسېدونکي ازادي راډيو ته وویل:
"لار د ترافیکو په مخ خلاصه ده، خلک پرې تګ را تګ کوي او کومه ستونزه نشته او خلک هم په خپلو ځمکو کې په کار و بار بوخت دي."
د کندز– تخار د لويې لارې یوه تن موټر چلوونکي په دې اړه ازادي راډیو ته وویل:
"زه له خان اباد څخه راغلم، لاره خلاصه شوې ده او د لارې امنیت دولتي ځواکونو نیولی دی، هېڅ کومه ستونزه نه تر سترګو کېږي."
د کندز– تخار پر لويې لارې هغه خلک چې تګ را تګ کوي وايي، اوس مهال یوازې سړک د وسلهوالو مخالفینو له شتون څخه پاک شوی دی، خو د سړک دواړو خواو ته په کلیو کې لاهم وسله وال مخالفین فعاله فزیکي حضور لري او لا هم دغه سړک د طالبانو تر جدي ګواښ لاندې دی.
دغه خلک وايي، څو چې د سړک شااوخوا کلي د وسله والو طالبانو له شتون څخه پاک نشي، نو احتمال لري چې بیا هم دغه لار د ترافیکو په مخ و تړل شي.
په ورته وخت کې د کندز امنیتي چارواکي بیا وايي چې دوی د دغې لارې د ډاډمن امنیت په خاطر د دغې لارې په اوږدو یو شمېر نوې امنیتي پوستې جوړوي.
خو دغه سړک د ماینونو د انفجار او همدارنکه د درنو وسلو د مرميو لګېدولو له کبله ډېر خراب شوی دی.
خو وسلهوالو طالبانو تر اوسه په دې اړه څه نه دې ویلې.
راپور: اجمل ارین
